Guterriş Kovid-19 vakśinası qadattı

Berläşkän Millätlär oyışması ğomum särqatibe Antonio Guterriş korornavirus vakśinası qadattı. Ul AQŞnıñ N’yu-York şähärendä bilgelängän “65 yäş’ häm ölkänräklär” kriteriyena turı kilä. Guterriş vakśina qadatıp, anıñ kiräkle häm qurqınıçsız buluın da kürsätergä teläde.

Ğomum särqatib Kovid-19 vakśinasın yasatqannan soñ Twitterda belderü yasadı.

“Bügen koronavirus vakśinasınıñ berençe dozasın qadatuım öçen bäxetle häm räxmätlemen. Härkemneñ vakśina aluın täêmin itüebez kiräk. Barıbız imin bulğanğa qadär berebez dä tulısınça imin tügel,”-dide Guterriş.

BMO ğomum särqatibe süzçese Stefan Duyarriç beldergänçä, Guterriş vakśina yasatu öçen aldan yazılğan häm härkem şikelle çiratqa basıp kötkän.