İtaliyada yort - ber çınayaq qähwä bäyäsenä

İtaliyäneñ Siśiliya utrawındağı Troina şähärendä taşlap kitelgän yortlarnı 1 yevroğa satalar.

CNNnıñ xäbärenä qarağanda, qala xakimiyäte bu programma yärdämendä cirlekkä yaña yäşäwçelär tartıp kiterergä isäpli.

Troina mêrı Sebast’yano Fabio Veneśiya taşlandıq häm qarawçısız qalğan yortlarnı satu öçen maxsus küptelle êşçe törkem häm küçemsez milek agentlığı oyıştırdı.   Bu ay axırında 30 öyne 1 yevro bäyäsenä satuğa çığaraçaqlar. Tağın 100 yortnıñ muniśipalitet mölkätenä küçüe kötelä. Soñraq alarnı da satuğa quyaçaqlar.

Şunısın da assızıqlap äytergä kiräk, älege yortlarğa qarata berniçä şart quyıla. Troinadağı älege binalarnı satıp aluçılar 5 meñ yevro külämendä depozit kertergä häm öyne tözekländerergä tiyeş. Monıñ öçen 3 yıl birelä häm şul waqıt êçendä yortnı torğızuçı tülägän depozitın kire ala.  

Troinada öy satıp aluçılar buşlay balalar baqçası häm uquçılar öçen tüläwsez mäktäp avtobusı şikelle östenleklärdän faydalana ala. Monnan tış, yaña öy xucaları berençe 3 yılda küçemsez milek häm xezmät kürsätü salımnarınnan azat bulaçaq.

Siśiliyä utrawındağı Nebrodi milli parkında 1100 metr biyeklektä urnaşqan Troina şähäre iskitkeç manzarası öçen “Siśiliyäneñ balkonı” dip yörtelä.