Ministrlarnıñ yäşeren cıyılışında "çaqırılmağan qunaq"

Niderland jurnalistı Awrupa Berlege saqlanu ministrlarınıñ yäşeren cıyılışına sośial’ mediada çıqqan ber fotoräsemdäge mäğ’lümatnı qullanıp kerä.

“RTL Nieuws” kanalınıñ texnologiyä xäbärçese Daniêl’ Verlaan Niderland saqlanu ministrı Ank Bijleveld urtaqlaşqan räsemdä videoêlemtä yulı belän uzdırıluçı cıyılışqa kerü öçen kiräkle adres häm 6 bilgele sersüzneñ 5 bilgesen kürä. Berniçä omtılıştan soñ ul cıyılış belän êlemtä urnaştıra. Verlaan Awrupa Berlege saqlanu ministrlarına êkrannan kölemseräp qul bolğıy. “RTL Nieuws” kanalı isä bu mizgellärne êfirda kürsätep bara.

Cıyılışnı citäkläwçe Awrupa Berlege tışqı mönäsäbätlär häm iminlek säyäsäte yuğarı wäkile Djozef Borrell çaqırılmağan qunaqnı kürgäç: “Yäşeren cıyılışqa kerüegezne beläsezme?” –dip sorıy. Daniêl’ Verlaan: “Äye, ğafu itegez. Min Niderland jurnalistı. Cıyılışığıznı bülüem öçen ğafu ütenäm. Xäzer çığam,”-dip cawap birä. Cıyılıştağılar köleşä başlıy. Borrell: “Monıñ cinayät’ buluın beläsezme? Poliśiyä kilgänçe çıqsağız yaxşı bulır,”-dip belderä.

Ber Awrupa Berlege wäqalätlese äytüençä, älege waqıyğadan soñ cıyılış tämamlanğan. Ul yäşeren utırışqa bu räweşle kerüneñ qanunsız buluın häm kiräkle urınğa xäbär bireläçägen citkerde.