Cenaza yortında qanlı waqıyğa

Amerika Quşma ştatlarınıñ Çikago şähärendä bulğan qorallı höcümdä kimendä 14 keşe yaralandı. 9ınıñ xäle ayıruça awır.  

Waqıyğa “Rhodes” dip ataluçı cenaza yortı yänäşäsendä bula. Anda uzuçı yolada qatnaşuçılarğa kiçke säğat’lärdä höcüm itälär.

Şöbhäle 1 keşe saq astına alına.

Cirle matbuğat çaralarında çıqqan xäbärlärdä waqıyğanıñ şahitläre süzlärenä urın birelä. Alar berdän artıq atu qoralı qullanıluın belderä. Şahitlär atışnı keçkenä suğışqa oxşata. Höcüm bulğan uramda distälärçä buş yädrä tabıla.

Çikagoda iyün’ ayında ber atna axırında bulğan qorallı höcümdä kimendä 14 keşe ülde, 90ı yaralanğan ide. İllinoys ştatındağı älege qala ildä köç qullanu waqıyğaları iñ yış bula torğan şähärlärdän bersenä äwerelep bara.