Nissannıñ êlekkege idaräçese jurnalistlar qarşına çıqtı

Avtomobil’ citeşterü gigantı Nissannıñ êlekkege idarä räise Karlos Gon Yaponiyädän Livanğa qaçqannan soñ täwge tapqır interv’yu birde. Ul finans maxinaśiyälärdä ğayeplänep qulğa alınğan ide. Yaponiyädä êlekkege idarä räise öy sağında totıldı. Annan xatını yärdämendä qaçqannan soñ Gon Livanda sıyındı. Ul üze dä çığışı buyınça livanlı.

Karlos Gon başqala Beyruttağı jurnalistlar berlege binasında matbuğat cıyılışı oyıştırdı. Ul anda Yaponiyädän niçek tügel, ni öçen qaçuın söyläyäçägen belderde. Gon äytüençä, ul bu çığışı belän imidjın çistartırğa tırışa, şäxesenä qarata ğayepläwlärneñ nigezsez ikänen häm qulğa alu kiräk bulmawın söyli.

Gon Yaponiyädä yuridik dairälär tarafınnan üzenä qarşı yünältelgän ğayepläwlärne qabul itü öçen basımğa duçar buluın alğa sörä. Livanda isä ul mösafirpärwärlek kürüen citkerä.    

Êlekkege direktor üze qulğa alınğan 2018nçe yılnıñ noyabrennän birle Nissan şirkäteneñ kön sayın 40 million dollar yuğaltuın äytä.

Reno-Nissan-Mitsubişi al’yansınıñ êlekkege idarä räise Gon yıllıq keremnären kimetep kürsätüe häm şäxsi investiśiylärdän kilgän zararnı şirkättän tülätüe säbäple “finans maxinaśiyä” häm “wazıyfasın naçar niyät belän qullanu”da ğayeplänep 2018nçe yılnıñ 19nçı noyabrendä Yaponiyädä qulğa alındı. Soñınnan anı öy sağına küçerdelär. 31nçe dekabr’dä Gon şäxsi oçqıç belän İstanbul arqılı Livanğa qaçtı. Êşmäkärneñ öyenä konśert quyarğa kilgän muzıka törkemeneñ tawış sistemaların yörtüçe zur qap êçendä ildän qaçuı farazlana. Monı xatını oyıştırğan digän süzlär dä bar.