20 köngeräne ütergän keşe saq astında
19 yäş'lek ğayeplegä 5 yıl törmädä utıru yanıy
Avstraliyäneñ Yaña Kön’yaq Uêl’s töbägendä maşinası belän tönlä yul qırıyında yatqan köngerälärne taptatqan 19 yäş’lek yeget mäxkämä qarşına çığaçaq. Ul xaywannarnı cäberläw häm ğazaplawda ğayeplänä. Anıñ maşinası astında qalğan 20 köngerä ülgän.
Töbäk poliśiyäsennän belderülärençä, waqıyğa uzğan atna yäkşämbe Êden şähärçege yänäşäsendäge Tura plyajı tiräsendä bula. Tärtip saqçıları anda küp sanda köngeräneñ maşina belän izelep ülüen häm yaralanuın kürep ala.
Poliśiyä xezmätkärläre tikşerü barışında älege wäxşilekne êşläwçeneñ 19 yäş’lek yeget buluın açıqlıy. Anı êläkterälär.
Bügen ğayeplene mäxkämä qarşına çığardılar. Anıñ 26nçı noyabr’dä xökem iteläçägenä qarar birelde. Ul köngä qadär ğayeple räşätkä artında utıraçaq.
Yaña Kön’yaq Uêl’s töbägeneñ qırğıy xaywannarnı qotqaru oyışması süzçese Yelena Vever beldergänçä, ülgän köngerälär arasında kesäsendä balasın taşuçı änilär dä bulğan. 3 näni köngeräne qotqarğannar, xäzer alar küzätü astında.
Yaña Kön’yaq Uêl’s töbäge qanunnarı buyınça, xaywannarnı cäberläwdä ğayeple dip tabıluçılarğa 5 yılğa qadär törmä yäisä 22 meñ Avstraliyä dolları külämendä ştraf qaralğan.
