Seber ut êçendä

Rusiyäneñ Seber töbäge häm könçığışında uzğan atnadan birle däwam itüçe yanğında 3 million gektardan artıq urman kölgä äylände. Bik küp xaywannar ülde.

Bu xaqta ilneñ Ğadättän tış xällär ministrlığı belderüendä äytelä. Anda yazılğança, yanğınnan çıqqan töten 20 töbäkkä cäyelgän. 500dän artıq toraq punkt annan zıyan kürä.

Yanğın urınına Ğadättän tış xällär ministrlığınıñ 15 meñ xezmätkäre cibärelgän.

Rusiyä däwlät başlığı Vladimir Putin saqlanu ministrlığına da yanğın sünderü êşlärenä yärdäm itärgä kürsätmä birde. Alar waqıyğa urınına 10 oçqıç häm 10 boralaq yulladı.

Xökümät räise Dmitriy Medvedev isä Krasnoyarsk şähärendä aşığıç cıyılış ütkärde. Anda tabiğıy baylıqlar häm êkologiyä ministrı Dmitriy Kobılkin sünderü êşläre öçen byudjettan 3 milliard sum (262 million törek lirası) soradı.    

Rusiyädäge qanunnar buyınça, urmanda çıqqan yanğınnı sünderü çığımnarı ut kiteräçäk zıyannan artığraq bulğanda, gubernatorlar yanğınnı sündermäw qararı çığara ala.

Älege qanun êkologlar tarafınnan bik nıq tänqıyt’länä.

Seberdäge yanğınnarnıñ säbäbe êsse hawadan dip farazlana. Bötendön’ya meteorologiyä oyışmasına mäğ’lümatlarına qarağanda, töbäktä iyül’ ayında temperatura urtaçadan 10 gradusqa yuğarı bulğan.  

Rusiyäneñ İrkutsk, Krasnoyarsk, Zabaykal’sk, Yakutiyä häm Buryatiyä töbäklärendä ğadättän tış xäl iğ’lan itelde.