Dön’yanıñ iñ zur narkobaronına ğomerlek törmä

Dön’yanıñ iñ zur narkobaronı bularaq bilgele Êl Çapo (kärlä) quşamatlı Xoakin Gusman ğomerlek törmä cäzası aldı. Ul Meksikadağı narkokartel’ Sinaloanıñ atamanı.

 Êl Çaponı AQŞnıñ N’yu-York ştatında Bruklin federal’ mäxkämäsendä xökem ittelär. Ul soraw alu waqıtında izolyatorda kiçergän 30 ayda üzenä bik naçar möğamälä kürsätülären, ğadel xökem prośessı bulmawın söyläde.

Federal mäxkämä fevral’ ayında Gusmannı tuqtawsız cinayät’ omtılışı yasaw, narkotiktan keremnärne ağartu, qorallı bäreleş, keşe üterü, almaz belän qanunsız säwdä itü, kokain, geroin, marixuana häm başqa narkotiklar belän xalıqara säwdä şikelle 10 maddäneñ barısınnan da ğayeple dip taptı.  

Xoakin Gusman üz waqıtında Forbsnıñ milliarderlar isemlegendä ide. Anı ozaq waqıt êzlädelär. 2001nçe yılda ul Meksikadağı ber törmädän ker taşuçı arbağa yäşerenep qaçqan ide. Êläkterelgännän soñ, 2015nçe yılda qabat yuğarı saq astındağı törmädän qaçuğa ireşte. 2016nçı yılnıñ ğıynvarında anı yañadan totıp AQŞqa tapşırdılar.