Tarrantnıñ berençe utırışı uzdı

Yaña Zelandiyäneñ Kraystçerç şähärendäge Nur häm Linvud mäçetlärendä 50 keşene ütergän häm 50sen yaralağan terrorçı Brenton Tarrantnıñ yuğarı mäxkämädä täwge utırışı uzdı. İlneñ iñ qırıs rejimlı Oklend törmäsendä ber keşelek kamerada totıluçı 28 yäş’lek terrorçını mäxkämä zalına kitermädelär. Ul utırışta videoêlemtä aşa qatnaştı.  

Kraystçerş yuğarı mäxkämäse sud’yası Kameron Mander 50 ayırım üterü häm 39 üterergä mataşuda ğayeplänüçe terrorçını 14nçe iyün’däge utırışqa qadär Oklend törmäsendä totu qararı çığardı. Monnan tış, Tarrantnıñ  xökem itelügä äzer buluın açıqlaw öçen aqıl yağınnan sälamätlege dä tikşereläçäk. Sud’ya äytkänçä, bu ğadäti prośedura häm monı başqa törle añlarğa kiräkmi.