Venesuêladağı ut betüdä Amerika ğayepleme?

Venesuêlanı ike kön qarañğılıqta totqan êlektr ênergiyäsendäge özeklekneñ Amerika Quşma Ştatları tarafınnan yasaluın farazlıylar. Däwlät başlığı Nikolas Maduro äytüençä, bu yuğarı texnologiyälär yärdämendä başqarılğan höcüm.

İke kön utsız utırğannan soñ Karakasta Maduronı yaqlap miting uzdı. Anda belderülärençä, ilneñ zur öleşen êlektr belän täêmin itüçe Guri stanśiyäsenä kiber höcüm yasağan. Maduro utsız ike kön öçen üzen waqıtlıça däwlät başlığı dip iğ’lan itkän Xuan Guaydonı cawaplı sanıy.

Ul Venesuêlanıñ “qaqşatu suğışı” êçendä qaluın belderde. “Bügen ildäge êlektr ênergiyäse özeklegeneñ 70%ın beterdek, ämma êlektr tapşıru liniyälärenä barı tik AQŞta bulğan yuğarı texnologiyälär qullanılıp höcüm yasaldı,”-dide Maduro. Anıñ fikerençä, Venesuêlanıñ milli êlektr ênergiyäse şirkätendä agentlar bar. Maduro tizdän alarnıñ açıqlanıp xökem iteläçägen äytte.

Venesuêlada pänceşämbe könne 23 töbäkneñ 22sendä ut bette. Xökümät monıñ kiber höcüm buluın beldersä, oppoziśiyä êlektr ênergiyäsendäge özeklekneñ asqormanıñ iskerüe säbäple kilep çığuın alğa sörde häm bu oçraqta däwlät başlığı Nikolas Maduro idaräsen ğayepläde.