Qıtayda yulbarıs häm mögezborınnardan yasalğan êşlänmälärne satu
Qıtay xökümäte älege ike xaywannan yasalğan êşlänmälärne satunı tıyuçı qanunnı ğamäldän çığardı
Qıtay yuqqa çığu aldında toruçı yulbarıs häm mögezborınnardan yasalğan êşlänmälärne satunı tıyğan qanunnı ğamäldän çığardı. Xökümättän yasalğan belderüdä äytelgänçä, älege êşlänmälärne satuğa “maxsus şartlarda” röxsät bireläçäk. Säwdä xökümätneñ kontrole astında başqarılaçaq. Mögezborın mögeze belän yulbarıs söyäkläre barı tik “mediśina tikşerüe häm yara däwalaw” maqsatı belän fermada üsterelgän xaywannardan täêmin iteläçäk.
Belderüdä 1993nçe yıldan birle ğamäldä bulğan qanunnı beterü säbäpläre kürsätelmi.
Qıtaynıñ bu adımına Bötendön’ya tabiğat’ne saqlaw waqıfı häm başqa oyışmalar rizasızlıq belderde. Qanunnıñ ğamäldän çığuınıñ dön’ya külämendä cimergeç näticälärgä kiteräçägen iskärttelär.
Bötendön’ya tabiğat’ne saqlaw waqıfı wäkile Margaret Kinnird yulbarıs häm mögezborınnıñ sanı bu qadär az sanda bulğanda häm yuqqa çığu qurqınıçı yanağanda öleşläre belän säwdä itüneñ bik xätär ikänen söyläde.
Tirä-yaq moxitne tikşerü agentlığınnan belderülärençä, Qıtay, tıyuğa qaramastan, ozaq waqıtlar üle xaywannarnıñ söyäkläre cıyılğan yulbarıs fermalarına häm mediśina maqsatınnan buluı äytelgän säwdägä küz yomıp röxsät birde.
2016nçı yılda çığarılğan xisapta tabiğat’tä 3 meñ 890 yulbarısnıñ qaluı äytelä. Mögezborınnar belän bäyle tikşerenülär isä älege xaywannarnıñ 30 meñnän az buluın açıqladı.
