Angela Merkel’nıñ Mäsüt Özil turında belderüe

Germaniya kanślerı Angela Merkel’ rasaçıl höcümnär arqasında ilneñ cıyılma komandasınnan kitkän törek futbolçı Mäsüt Özil mäs’äläsendäge tartqalaşularnı oşatmawın belderde. Ul bu xaqta ber televizion kanalında söyläde. Merkel’ uzğan atnada Germaniya ilbaşı Frank - Val’ter Ştaynmayernıñ migrantlar belän oçraşıp “Berençe häm ikençe sıynıf watandaş yuq” digän süzlären iskä töşerde. Kanśler monıñ rasaçılıqqa qarşı belderü buluın äytte. Merkel’ üzeneñ dä ütkändä möhacir çığışlı yäş’lärgä yış qına: “Min sezneñ xökümät räisegez,”-diyünen xäterlätte.

Kanśler törek futbolçı Mäsüt Özil belän bäyle bäxäslär turında da süz quzğattı. “Fotonıñ döres yäki yalğış buluı mäs’äläsendä törle fikerlär bulırğa mömkin. Ämma şunnan soñ bulğan tartqalaşu räweşe küñelemä hiç oşamadı,”-dide ul.

Merkel’ bu mäs’älädä nıqlı qaraşta toruın belderde häm: “Özil bulsın, başqası bulsın - ägär möhacir çığışlı beräw “Miña bu cämğıyät’tä naçar möğamälä kürsätälär” dip äytä ikän, monı citdi qabul itü häm söyläşü kiräk,”-dide.

Törek çığışlı Germaniya futbolçıları Mäsüt Özil häm İlkay Gündoğan, Angliya prem’yer-ligasında uynawçı milli futbolçı Cänk Tosun may ayında Törkiyä ilbaşı Räcäp Tayyip Ärdoğan belän oçraşıp fotoğa töşte. Şunnan soñ Germaniyada Mäsüt Özil häm İlkay Gündoğanğa qarata höcüm kampaniyäse başlandı. Näticädä Mäsüt Özil ilneñ cıyılma komandasınnan kitüen belderde.