Tramptan Putinğa xat

Rusiyägä säfär yasawçı amerikalı senator Rend Pol AQŞ ilbaşı Donal’d Trampnıñ xatın Rusiyä däwlät başlığı Vladimir Putin idaräsenä tapşırdı.  

Pol bu xaqta Twitter säxifäsendä dä yazıp çıqtı. “İlbaşı Trampnıñ xatın däwlät başlığı Putin idaräsenä tapşıru bäxetenä iyä buldım. Xatta terrorçılıqqa qarşı köräşü, parlamentlar arasındağı bağ’lanışlarnı arttıru häm mädäniyät tarmağındağı söyläşülärne däwam itüne dä kertep törle mäydannardağı xezmättäşlekne üsterüneñ ähämiyäte assızıqlandı.

Kreml’ dä xatnıñ kilüen rasladı. Süzçe Dmitriy Peskov xatnıñ Rusiyägä diplomatik kanallar aşa kilüen häm tizdän Putin tarafınnan uqılaçağı kötelüen belderde.  

Cömhüriyätçe Pol Mäskäwdä parlamentnıñ öske häm asqı palataları wäkilläre, şulay uq tışqı êşlär ministrlığınıñ räsmi zatları belän oçraştı.

Bügen ul Sankt-Peterburgka barıp, anda da şähär idaräse wäkilläre belän oçraşular ütkäräçäk.

Trampnıñ Rusiyä belän yaqınayu teläge ser tügel. 16nçı iyül’dä Xel’sinkidä Putin belän bulğan oçraşu da moña dälil.  Senator Rend Pol Trampnıñ bu omtılışın xup kürä. Ul Rusiyägä säfäreneñ maqsatı da Vaşington belän Mäskäw arasındağı bäyläneşlärgä köç birü buluın belderde. “Dön’ya butalçıq urın. Süriyä häm başqa cirlärdä bez Rusiyä belän yaqın poziśiyädä. Arabızda êlemtä kanallarının yabıq buluı zur xata,”-dip söyläde amerikalı senator. Ul Rusiyä parlamentı delegaśiyäsen Vaşingtonğa çaqırdı.