12 könlek bäbäyneñ teşen aldılar

Angliyädä tabiblar äle 12 könlek kenä bäbäyneñ teşen suırtıp alırğa mäcbür buldılar. Stomatologlar İsla-Rouz Xeysmannıñ älegä qadär üzlärenä möräcäğat’ itkän iñ keçkenä xasta buluın belderde. Bäbäy ber aylıq ta tügel, şuna kürä aña anesteziya yasalmadı, barı tik awırtunı basuçı krem sörtelde.

Belgeçlär äytüençä, tumıştan teş siräk kürensä dä, bäbäy öçen bu şaqtıy xätär. Ul barı tik imezü waqıtında qıyınlıq tudırmıy. Balanıñ telendä yara çığarğa mömkin. Şulay uq selkenüçe teşneñ töşep sabıynıñ üpkäsenä kitüe bar.

Angliya teş tabibları berlege mäğ’lümatları buyınça, 2 meñ balanıñ berse tumıştan teşle bula. Tamırları citärlek däräcädä üsmägän öçen, ğadättä, ul üze töşä.     

Bäbäylärneñ kübese barı 6 aylıq waqıtta teş çığara. Älbättä, bu üzgärergä mömkin. Qayberläre 4 aydan, ikençeläre 1 yäşendä täwge teşle bula.

İsla-Rouz Xeysmannıñ änise Jasmin isä balasın bu qadär keçkenä yäş’tä teş tabibına alıp barırğa mäcbür bulacağın küz aldına da kitermäwen söyli. “Teş selkenep tordı häm suırtılırğa tiyeş ide. Bäbäyem minnän dä qıyu bulıp çıqtı, yılamadı da,”-dide Anna Jasmin.