Äsäd rejimı törmälärennän 10 xatın-qız azat itelde

Süriyädä Bäşşar Äsäd rejimı törmälärendä 2 yıldır xaqsızğa totılğan, cäber-zolım kürgän häm köçläwlärgä duçar bulğan 10 xatın-qıznı äsir almaştıru yulı belän irekkä çığardılar. Alar İdlib, Xoms töbäklärennän alınğan bulğan. İrekkä, şulay uq, Bäysez Süriyä armiyäseneñ 1 xärbiye dä çıqtı.

Oppoziśiya komandirı Möxämmät Paşa Anadolu agentlığına beldergänçä, bu xatın-qızlarnı qotqaru öçen bik nıq tırışlıq quyılğan. 1 yıl êlek rejimnıñ 9 xärbiyen äsir alğannar. Şulay itep, äsir almaştıru mömkinleğe tuğan. Möxämmät Paşa üzläreneñ äsir töşkän rejim xärbilärenä naçar möğamälädä bulmawlarına, xätta kitkändä koçaqlaşıp, xällälläşep kitülärenä basım yasadı. “Çönki bez törekmännär, törkilär. Xätta suğışta da äsirlärgä naçar möğamälädä bulmıybız. Ämma Äsäd rejimı ber ğayepsez qızlarıbız, xatınnarıbızğa böten naçarlıqnı êşläde. Alarnıñ söylägännären tıñlağannan soñ betmäs-tökänmäs näfrät uyandı,”-di komandir.

Rejim alıp kitkän 7 meñ xatın-qıznıñ äle xaman kire qaytmawın, alar arasında 400läp qız balanın da buluın ul açınıp söyli. Möxämmät Paşa äytüençä, bu xatın-qızlar häm balalar här kön köçläwlärgä duçar bula, cäzalandırıla, 10 köngä 1 tapqır rizıq birelep aç totıla.