Dön’ya matbuğatına küzätü 23.08.2021

France 24 televideniyese citkergänçä Franŝiyada mäktäplärneñ 2nçe sentäbr’da açıluı belän urta mäktäp häm liŝey uquçıların üz êçenä aluçı Kovid-19 vakŝinaŝiya kampaniyase başlanaçaq.

“Le Monde” gazetı yazğança Franŝiyada sälamätlek liŝenziyasenä qarşı oyıştırılğan çaralar 6 atna buyı däwam itä. Êçke êşlär ministrlığına kürä ildäge protest çaralarında 175 meñ yarımnan artıq keşe qatnaştı.  

France 24 xäbärenä kürä Gaitida barlıqqa kilgän cirteträwdän soñ ülüçelär sanı 2200 buldı, humanitar yärdämnärne töbäkkä ireşterü qıyınlaşa. 

Omannıñ “El-Vatan” basması beldergänçä Äfğanstannan êvakuaŝiyalär däwam itä. Bötendön’ya azıq-tölek oyışması fäläkätne buldırmaw mäs’äläsendä kisätä.

Ğıyraqta dön’ya kürüçe “El-Zeman” gazetı citkergänçä Ğıyraq prem’yer-ministrı Mostafa El-Kazımi Kuveytka kitte.

Alman telendäge Tagesschau.de säxifäse yazğança Germaniyaneñ şaqtıy şähärendä oyıştırılğan çaralarda meñnärçä äfğanlınıñ qaçaq bularaq ilgä qabul itelüe soraldı.

Deutsche Welle media oyışması xäbär itkänçä Germaniyada koronavirus oçraqları qabat arta başladı. Küpçelek urınnarğa vakŝina yasatuçılar, koronavirus belän awıruçılar yäisä negativ test näticäse bulğannar ğına kerä ala.

Focus.de xäbär säxifäse Awstriya prem’yer-ministrı Sebast’yan Kurŝnıñ Äfğanstannan qaçaqlarnı qabul itärgä telämäwe turında yaza.

TASS agentlığı beldergänçä Ukraina ilbaşı Vladimir Zelenskiy ber törkem rus şirkäten bloklawçı qararnamägä qul quydı.  Alar arasında Rostelekom da bar.

RİA Novosti agentlığı Rusiyä tışqı êşlär ministrı Sergey Lavrovnıñ süzlären citkerä: “Tön’yaq Ağım-2 proyektı Awrupanıñ ênergetika iminlegen 10 yıllar buyı köçle totaçaq.”

“İzvestiya” gazetı xäbärenä kürä Rusiyäneñ tışqı êşlär ministrlığı Rusiyäneñ xalıqara bank sisteması SWİFTtan çığarılu qurqınıçınıñ bulmawın belderde.

İspaniyaneñ “El Pais” basması citkergänçä AQŞ ilbaşı Djo Bayden Äfğanstannan êvakuaŝiya barışındağı yärdämnäre öçen İspaniyağa räxmät belderde.

Şul uq ildä basıluçı “El Mundo” gazetı yazğança İspaniyada ütkärelgän ber tikerenü balalarda soñğı waqıtta Kovid-19 arqasında küzätelgän yuğarı tän temperaturasınıñ T küzänäkläreneñ zäğıyf’länüenä bäyle buluın kürsätte.

Venesuêlanıñ “El Nacional” basması beldergänçä Venesuêladağı Berläşkän tabiblar törkeme ilgä haman da Qıtaydan şaqtıy vakŝinanıñ kerüen fäqat räsmi zatlarnıñ monı açıqlamawın äytte.

 “Tatar-inform” mäğlümat agentlığı xäbär itkänçä Qazanda Tatarstannıñ xalıq artistı Räşit Şamqaynı soñğı yulğa ozattılar.