Дөнья мaтбугaтынa күзәтү - Dön’ya matbuğatına küzätü 18.06.2021

Le Monde: Kot-d’İvuarnıñ êlekke Däwlät başlığı Laurent Gbagbo 10 yıllıq sörgennän soñ ilenä qayttı.

France 24: Franśiya İlbaşı Êmmanuêl Makron (kitap) uqunı töp milli êşkä äyländerä.

Le Soir: “Euro 2020”: (Bel’giyanıñ milli taqımı) “Şaytannar” awır matçtan soñ Daniyanı uzıp (1-2 isäbe belän) törkemnän çığunı garantiyäläde.

“äl-Düstur” gazetı (Yordaniya): İzrail ğaskäre Fälästinneñ Äl Halil şähärendä ike öyne cimerde häm 12 qorılmanıñ cimereläçägen iğ’lan itte.

“äl-Quds äl-Arabi” (Soğud Ğäräbstanı): İzrail oçqıçları Ğazzä sızığında qayber urınnarnı bombaladı.

“äl-Rayä äl-Qatariyye” gazetı (Qatar): (75 ildän 680 xalıqara fizik häm yuridik zat qul quyğan häm AQŞ İlbaşı Djo Baydenğa cibärelgän açıq xatta) Waşingtonnan İzrailneñ Fälästinlelärgä qarşı basımnarın tuqtatuı taläp itelä.

Deutsche Welle: Diplomatik mönäsäbätlär: Germaniya saqlanu ministrı Annegret Kramp-Karrenbauer törek wazıyfadaşı Hulusi Akar belän oçraştı.

dpa: İq’tisadçılarğa kürä, Germaniya iq’tisadı üsä başladı.

RBK: AQŞ Milli iminlek kiñäşçese Djäk Sallivan AQŞ İlbaşı Djo Baydennıñ Rusiyä wazıyfadaşı Vladimir Putin belän oçraşuı waqıtında artığınnan dus kebek xäräkät itüen kire qaqtı häm amerikan liderınıñ kiresençä keşe xoquqları belän bäyle şaqtıy mäs’älädä Rusiyä liderına üz qatğıy süzen citkerüen äytte.

Ria Novosti: Rusiyä tışqı êşlär ministrlığı xäzerge waqıtta 17 amerikalınıñ Rusiyä törmälärendä buluın belderde.

Lenta.ru: Mäskäw şähär xakimiyäte başlığı Sergey Sobyanin başqalada koronavirus kizüe belän bäyle wazğiyätneñ tiz naçarayun äytte.

El Mundo (İspaniya): İspaniya bilgele ber töbäklärdä monnan arı bitlek qullanu mäcbüriyäten beterü mäs’äläsen bäxäsläşä.

El Pais (İspaniya): Qıtayda aêroportlarda qullanılğan êffektiv yöz tanu sistemaları monnan arı böten Awrupa Berlege illärendä bulğanı kebek İspaniya hawa mäydannarında da qullanılaçaq.

El Nacional (Venesuêla): AQŞ Kovid-19 belän köräş qısasında Venesuêlanıñ qayber ixtıyac äyberlären aluı öçen çikläwlärne yomşatu qararın qabul itte.  

Tatarstannıñ “Tatar-inform” agentlığı “Tatar ğalimnäre törek simpoziumında tatar ädäbiyätında irek temasına çığış yasıy” isemle yazmasında tatar ğalimäläreneñ Törkiyäneñ Atatörek isemendäge universitetı oyıştırğan xalıqara fänni simpoziumda qatnaşuın xäbär itä. Agentlıq beldergänçä, xalıqara fänni cıyında Tatarstannan Flyora Säyfullina, Törkiyädän Ramilä Yıldırım-Yarullina häm Çulpan Zarif-Çätin qatnaşa.