Üzbäkstan İlbaşı Şäwkät Mirziyayıvneň Paqıstan säfäre

3nçe-4nçe mart könnärendä Üzbäkstan İlbaşı Şäwkät Mirziyayıv Paqıstan İslam Cömhüriyätenä berençe däwlät säfären yasadı. İlbaşı Şäwkät Mirziyayıvne hawa mäydanında Paqıstan Baş ministrı İmran Xan üze qarşı aldı. Başqala İslamabadtağı Ministrlar Kabinetı sarayında uzğan räsmi qarşı alu tantanasınnan soñ ike lider üzara söyläşte. Qara-qarşı söyläşüdän soñ wäkilleklärara söyläşü ütkärelde. Uzdırılğan söyläşülär näticäsendä ike il arasında 10 tiräsendä kileşü imzalandı.

Liderlar oyıştırğan matbuğat oçraşuında uzğan yılda pandemiyağa qaramastan ike yaqlı säwdä külämeneñ 50%qa artuına iğ’tibar yünältelde häm taraflarnıñ urtaq säwdä külämeneñ berniçä yılda 500 million dollarğa citkerüne maqsat itülärenä basım yasaldı. İslamabadta säfär qısalarında bulıp uzğan Paqıstan-Üzbäkstan êş forumında 800 million dollarlıq 60 kileşügä qul quyıluı açıqlandı. Xäzerge waqıtta Üzbäkstanda Paqıstan investorlarınıñ 177 şirkäte êşçänlek alıp bara.

İslamabadta İlbaşı Şäwkät Mirziyayıv häm Baş ministr İmran Xan Tirmiz-Mäzari Şärif-Qabul-Päşavar timer yulı proyıktınıñ Äfğanstan öleşeneñ tämamlanuınıñ yul kartasın söyläşte. Liderlar Taşkent-Lahor häm Taşkent-İslamabad arasında turıdan-turı oçqıç säfärläreneñ başlatıluı mäs’äläsendä dä kileşte. Ciröste transportı ölkäsendä Taşkent häm İslamabad arasında xezmättäşlek kileşüe ğamälgä kerde. 2021nçe yılnıñ may ayında ike il arasında berençe yök maşinası säfärläre başlağan ide. Üzbäkstan okeanğa Paqıstan aşa açıla.

2022nçe yılnıñ 4nçe mart könne İlbaşı Mirziyayıv İslamabadta Paqıstannıñ aldınğı şirkätläreneñ başlıqları belän oçraştı. Şäwkät Mirziyayıvneñ Paqıstan säfäre Paqıstan İlbaşı Arif Alvi belän ütkärgän söyläşüdän soñ tögällände. İlbaşı Mirziyayıv wazıyfadaşın Üzbäkstanğa çaqırdı.

Säfär waqıtında iminlek ölkäsendä xezmättäşlekneñ yul kartasın küzdä totuçı kileşügä imza salındı. Paqıstan, Üzbäkstan häm Törkiyä  2019nçı yıldan birle öç yaqlı xärbi künegülär ütkärä. 2021nçe yılnıñ noyabr’ ayınıñ başında Üzbäkstan Milli iminlek şurası ğomum särkätibe Viktor Mahmudov Paqıstanğa öç könlek êşlekle säfär yasağan ide.

Üzbäkstan-Paqıstan mönäsäbätläre strategik xezmättäşlek torışında. Strategik xezmättäşlek kileşüe 2021nçe yılnıñ iyül’ ayında Baş ministr İmran Xannıñ Üzbäkstan säfäre waqıtında imzalandı. Şunı da bilgeläp uzıyq: soñğı ike yılda Üzbäkstan İlbaşı Şäwkät Mirziyayıv belän Paqıstan Baş ministrı İmran Xan altı tapqır küreşep söyläşä.

Üzbäkstan belän Paqıstan Şanxay xezmättäşlek oyışması, İslam xezmättäşlek oyışması häm İq’tisadi xezmättäşlek oyışması kebek regional’ oyışmalar qısasında da xezmättäşlekne üsterä. Mirziyayıvneñ İslamabad säfäre waqıtında Äfğanstandağı wazğıyät liderlarnıñ töp kön tärtibe mäs’äläläre arasında ide. Çönki här ike ilneñ Äfğanstan belän çik buyı häm yaqın xezmättäşlege bar. Urta Aziyanıñ Kön’yaq Aziyağa açıluı häm töbäklärara xezmättäşlekneñ üsterelüe Taşkent-İslamabad mönäsäbätläreneñ barışına bäyle.

Qısqası, İlbaşı Şäwkät Mirziyayıvneñ İslamabad säfäre näticäle uzdı. Babur Şaxnıñ mirasçıları bulğan Paqıstan häm Üzbäkstan şaqtıy ölkädä yaqın xezmättäşlek urnaştıraçaq.

Abdrasul İsakov