Üzbäkstanda ilbaşı saylawı uzdı

Ağımdağı yılnıñ 4 nçe dekabrendä Üzbäkstanda ilbaşı saylawı uzdı. 2 nçe sentyabr’dä İslam Kärimov wafat bulğannan soñ Üzbäkstanda mäcbüri ilbaşı saylawı ütkärü qararına kilengän ide.

Üzbäkstan üzäk saylaw oyışması başlığı Mirza Ulugbäk Abdusalomov öylä säğät’lärendä ük saylawçılarnıñ yartısınnan kübrägeneñ saylaw büleklärenä barıp tawış birülären belderde.Kiçke säğätlärdä matbuğat oçraşuı ütkärgän Üzbäkstan üzäk saylaw oyışması başlığı ilbaşı saylawında saylawçılarnıñ 87,83%ınıñ ,yäğni 17 million 941 meñ 955 keşeneñ qatnaşuın citkerde. Mirza Ulugbäk Abdusalomov saylaw belän bäyle üzlärenä xäzergä bernindi şiqayät’ kilmäwen dä belderde.

Üzbäkstandağı ilbaşı saylawında 4 namzät köç  sınaştı. Alar:”Milli şahlanış demokrat” patiyäse liderı Sarvar Atamuradov,”Ğadälät sośial’ demokrat “partiyäse liderı Nariman Umarov,”Xalıq demokrat” partiyäse liderı Hotamjon Kätmonov  belän “Liberal’ demokrat” partiyäsennän ilbaşı wäkile häm prem’yer-ministr Şäwkät Mirziyoyev. 4 namzättän Kätmonov häm Umarov monnan êlekke ilbaşı saylawında qatnaşıp berse 3%, ikençese 2%tan kübräk tawış cıyğan ide. 32 million xalqı bulğan Üzbäkstanda 20 million 500 meñgä yaqın terkäwle saylawçı bar. Saylawçılar il külämendäge 9383 häm çit illärdäge 44 ärcädä tawış birde.

Saylawnı 50 gä yaqın il belän aralarında Awrupa iminlek häm xezmättäşlek oyışması,Bötendön’ya saylaw organnarı berlege, Şanxay xezmättäşlek oyışması ,İslam xezmättäşlek oyışması häm Bäysez däwlätlär Berlege dä bulğan oyışmalardan 600 dän kübräk xalıqara küzätüçe ,1300 dän kübräk cirle häm çit il jurnalistı küzätep bardı.  

       Saylawda “Liberal’ demokrat” partiyäse namzäte bulğan ilbaşı wäkile häm prem’yer-ministr Şäwkät Mirziyoyev  88,61% tawış cıyıp ciñügä ireşte. Qalğan namzätlär 2%tan 5 %qa qadär tawış cıya aldı. Mondıy näticäne härkem kötä ide. Üzbäkstannıñ ikençe ilbaşınıñ kem bulaçağı sentyabr’ ayında  ilbaşı wäkile bilgelängändä, bälki dä avgust ayınıñ soñğı könnärendä Kärimovnıñ xäle awır bulğan waqıtlarda uq bilgelängän ide. Üzbäkstan êlitası ildä xaos barlıqqa kilügä mömkinlek tudırmıyça bu barışnı bik uñışlı alıp bardı. Saylawnıñ bik tınıç uzuında monıñ da zur täêsire bar dip äytergä bula. Yuğisä Üzbäkstanda köçlärneñ töbäklärgä kürä taraluı häm bolar arasında kileşü bulmasa ildä totrıqlılıq täêmin itüneñ bik awır buluı härkemgä mäğ’lüm.

İlbaşı bulıp saylanğan Şäwkät Mirziyoyev ilbaşı wäkile bularaq kiläçäkkä ömet uyatqan adımnar yasadı.  Ozaq yıllar säyäsi säbäplär arqasında törmälärdä utırğan qayber şäxeslär irekkä cibärelde. Bu wäzğiyät’ Üzbäkstannıñ ayıruça Könbatış illäre belän mönäsäbätlären üsterügä mömkinlek tudıraçaq. İlbaşı idaräsendä şiqayät’ belderü liniyäse açıp watandaşlarnıñ mäs’äläläre belän yaqınnan qızıqsınaçağın äytte. Kärimov däwerendä izolyaśiyädä yäşägän sänğät’çe,sportçı häm bik küp tanılğan şäxeslär qabat illärenä qaytu häm üz hönären başqaru xoquqına iyä buldı.  Üzbäkstannıñ kürşe illär belän mönäsäbätläre soñğı 25 yılda bik yaxşı tügel ide. Çik buyı problemaları, su probleması kebek urtaq regional’ mäs’älälär Üzbäkstannıñ kürşeläre belän mönäsäbätlären qayçaq özelü noqtasına kiterep citkerde. Mirziyoyev ilbaşı wäkile bulıp bilgelänü belän kürşelär belän mönäsäbätlärneñ yaxşı bulacağın beldergän ide. Bu da ike yaqlı êlemtälärdä uñay çağılış taptı. Üzbäkstannıñ kiläçäge monnan soñ Şäwkät Mirziyoyev qulında. İlneñ soñğı aylardağı uñay täräqqiyät’lärne däwam itterep ittermäwe häm nindi yul saylayacağı 2017 nçe yılda bilgele bulır.