Awraziya kiñlegendä 15

Törki akademiya xalıqara oyışması ağımdağı yılnıñ 28 nçe martında Berläşkän Millätlär Oyışması ğomum üzägendä ”BMOnıñ 2030 nçı yılğı kön tärtibe öçen Yefäk yulında sinergiya”isemle xalıqara simpozium ütkärde. Simpoziumda Berläşkän Millätlär Oyışması ğomum üzägeneñ yuğarı däräcäle räsmi zatları belän bergä xalıqara oyışmalar başlıqları, törki cömhüriyätlärneñ BMOdağı daimi wäkilläre ,diplomatlar häm dönyaküläm tanılğan uqıtuçı – ğalimnär qatnaştı. Simpoziumnı açu tantanasında Qazaqstan ilbaşı Nursoltan Nazarbayev, Törkiyä Cömhüriyäte premyer - ministrı Äxmät Dawıtoğlu ,BMOnıñ tsivilizatsiyälär ittifaqı yuğarı wäkile Nassır Abdulaziz An-Nasär häm BMOdağı YUNESKO wäkilläreneñ qotlaw yullamaları uqıldı.

Simpoziumda TÜRKSOY ğomum särqätibe Düsän Kaseinov,Törki şura başlıq urınbasarı Abzal Saparbäkulı,törki şuranıñ aqsaqallar kiñäşmäse äğzası professor doktor Adil Äxmätov,törki mädäniyat häm miras fondı başlığı Günay Äfändiyeva çığış yasadı.

Xalıqara simpoziumda “Xalıqara cinayätlär häm çiktän tış ğamällärgä qarşı köräş qısasında Yefäk yulında häm anıñ däwamında global tınıçlıq häm iminlekne arttıru” , şulay uq “Mädäniyatlar berlege qısasında Yefäk yulın yañadan canlandıru aradaşçılığı belän däwam itterelä ala torğan qalqınu maqsatlarına ireşü”isemle panellär ütkärelde.

Törki akademiya simpozium qısasında Yefäk yulı östendäge Urta Aziya illäre xaqında tikşerenü eşçänlekläre belän xalıqlar arasında xezmättäşlekne nığıtıp mädäni bağlanışlarnı üsterügä öleş kertkän öçen 2015 nçe yılda Nobel büläge alğan professor doktor Aziz Sancarğa häm tanılğan uqıtuçı – ğalimnär professor doktor Kämal Karpat belän professor doktor Edward Allworthka altın medallär tapşırdı. Simpozium azağında cıyılışlarda qaralğan mäs'älälär belän bäyle protokol qabul itelde.

Törki şura ğomum särqätibe tulı waqalätle ilçe Ramil Xäsänov häm xalıqara törki akademiya başığı professor doktor Darhan Kıdıralı 28 nçe martta Berläşkän Millätlär Oyışması ğomum üzägendä yözdän kübräk qunaq qatnaşında qabul itü ütkärde.

Törki cömhüriyätlärneñ tağın ber oyışması TÜRKSOY şul uq könne BMO ğomum üzägendä 15 ildän kilgän yaqınça 200 sänğätçe qatnaşında Xalıqara Näwrüz köne uñayınnan mädäni çara ütkärde. Bu isä TÜRKSOYnıñ BMO ğomum üzägendä 5 yıldan soñ ütkärgän ikençe zur külämle çarası ide.

Älege oyışmalar citäkçeläre Berläşkän Milätlär Oyışması ğomum şurasında eşläwçe küp sanda säyäsätçe belän ike yaqlı häm wäkilleklär arası söyläşülär ütkärde. Söyläşülärdä monnan soñ da xezmättäşlekne däwam itterü qararına kilende.

Sovetlar Berlege tarqalğannan soñ bäysezleklären iğlan itkän törki cömhüriyätlärneñ bäysezlekläreneñ 25 yıllığında törki şura ,törki akademiya,TÜRKSOY,törki mädäniyat häm miras fondı xalıqara oyışmaları köçlären berläşterep törki mädäniyatnı tanıtu öçen kiñ qırlı çara ütkärde. New-Yorktağı Berläşkän Millätlär Oyışması ğomum üzägendä uzğan fän-belem häm mädäniyat çarası törki cömhüriyätlärneñ zur uñışı.Törki akademiyanıñ törki mädäniyatnı dönyağa tanıtuğa öleş kertkän häm üz eşendä uñışlarğa ireşkän ğalimnärne büläkläwe älege oyışmanıñ buşqa qına tözelmäwen bik açıq kürsätä.

2016 nçı yılnıñ 1-2 nçe aprelendä Amerika Quşma Ştatları başqalası Waşingtonda uzğan 4 nçe atom-töş iminlege yuğarı däräcäle oçraşuında Nazarbayev belän Ärdoğannıñ mediada kiñ çağılış tapqan eçkersez qoçaqlaşuı häm Azärbaycannıñ Qarabaxtağı cirlären kire alu operatsiyälärenä Törekmänstan belän Törkiyäneñ yaqlaw kürsätü turında süz birüe törki cömhüriyätlär sağınğan häm telägän täräqqiyätlär. Mondıy xezmättäşleklärneñ tağın da artıp däwam itüen teläp qalabız.