Awraziya kiñlegendä 13

Ağımdağı yılnıñ 15 nçe martında Azärbaycan ilbaşı İlham Aliyev Törkiyä – Azärbaycan yuğarı däräcäle strategik xezmättäşlek şurasınıñ 5 nçe cıyılışında qatnaşu öçen Änkarağa kilde. Törkiyä ilbaşı Räcäp Tayyip Ärdoğan qunaqnı ilbaşı kölliyätendä räsmi räweştä qarşı aldı. Qarşı alu tantanasında ütkännärdä tözelgän 16 törek däwläten simvollaştıruçı bayraqlar häm ğaskärlär dä urın aldı.

Törkiyä – Azärbaycan yuğarı däräcäle strategik xezmättäşlek şurasınıñ 5 nçe cıyılışı fevral ayında Azärbaycanda uzarğa tiyeş ide. Änkarada fevral ayında terror höcüme yasalğannan soñ ilbaşı Ärdoğan Azärbaycan säfären mart ayına kiçekterde. 13nçe martta Änkarada yänä qanlı höcüm başqarılğannan soñ cıyılışnı ikençe tapqır kiçekterü kön tärtibenä kilgändä Azärbaycan ilbaşı İlham Aliyev cıyılışnı Änkarada ütkärergä täqdim itte.

Aliyev belän Ärdoğan üzara häm wäkilleklär arası söyläşülär ütkärde. Wäkilleklär arası söyläşüdä ike ilneñ premyer-ministr urınbasarları,tışqı eşlär, eçke eşlär,saqlanu,iqtisad, transport,energetika ministrları häm bäyläneşle byurokratlar qatnaştı. İlbaşı kölliyätendä uzğan Törkiyä – Azärbaycan yuğarı däräcäle strategik xezmättäşlek şurasınıñ töp temasın Şah diñgez 2 nçe gaz mäydanı häm Xäzärneñ könyağındağı başqa mäydannarda citeşterelgän tabiği gaznı berençe çiratta Törkiyägä ,annan Awrupağa qudırunı maqsat itep quyuçı Trans Anadolu tabiği gaz ütkärgeçe liniyäse proyektın tizlätü täşkil itte.

Cıyılış azağında ilbaşları urtaq belderge imzaladı. Annan soñ ike il arasında 5 kileşügä qul quyıldı. Bolar Törkiyä xökümäte belän Azärbaycan xökümäte arasında xärbi häm xärbi bulmağan personal belän sotsial häm mädäni maqsatlı almaşu protokolı, Törkiyä belän Azärbaycan arasında diplomatik missiya häm konsullıq xezmätkärläreneñ,ğailä äğzalarınıñ tabış kiterüçe eşlärdä eşläwläre turında kileşü, Törkiyä belän Azärbaycan arasında yuridik tikşerülär tarmağında xezmättäşlek turındağı kileşü,Törkiyä belän Azärbaycan arasında avtomobil yörtüçe tanıqlıqların almaştıru häm ike yaqlı bularaq tanıluı turında kileşü,Törkiyä belän Azärbaycan arasında texnik xezmättäşlek protokolı ide.

Soñınnan Törkiyä häm Azärbaycan ilbaşları matbuğat äğzaları öçen brifing ütkärde. Terrorğa qarşı bergä eşçänlek başqarunı däwam itteräçäklären belderüçe ilbaşları “TANAP”proyektın planlaştırılğan waqıttan tağın da irtä beterü öçen tırışaçaqların citkerde.

Ärdoğan ilbaşı kölliyätendä qunaq öçen aş mäclese oyıştırdı. İlham Aliyev şul uq könne säfären tögälläp ilenä qaytıp kitte.Törkiyä ilbaşı anı oçqıçına qadär ozata bardı.

Törkiyä xäzerge waqıtta terror waqiğaları artu säbäple awır könnär kiçerä. Aliyev mondıy waqıtta ike däwlät ber millät ğibaräseneñ süzdä genä bulmawın tağın ber tapqır isbatladı. İke il citäkçeläre dä wazıyfalarına kereşkäç berence çit il säfärlären ber-bersenä yasıy. Bu kürkäm traditsiyägä äwerelde.Uzğan yıl Törkiyä ilbaşı Räcäp Tayyip Ärdoğan , premyer - ministr Äxmät Dawıtoğlu ,Törkiyä Böyek Millät Mäclese başlığı Kahraman berence çit il säfärlären Azärbaycanğa yasadı.

Azärbaycan belän Törkiyä töbäk häm dönya kiläçägenä yoğıntı yasayaçaq zur külämle proyektlar östendä eşli. Şuña kürä dä energetika häm transport tarmağındağı proyektlar ike ilneñ strategijk däräcädä mönäsäbätlär urnaştıruın mäcbüri qıla. Azärbaycannıñ “SOCAR”şirkäte Törkiyäneñ iñ zur turıdan-turı çit il investitsiya şirkäte wäzğiyätendä. Üzäge İstanbulda urnaşqan Törki dönya injenerlar häm arxitektorlar Berlege 2016 nçı yılnı Xäydär Aliyev yılı itep iğlan itte. Xäydär Aliyev yılınıñ açılışı 18 nçe martta Änkarada uzdı. Älege misallar ike il mönäsäbätläreneñ däräcäsen kürsätü cähätennän bik möhim.

Berençe çiratta Qarabax bulu belän bergä töbäktäge problemalarnı çişü öçen dä ike il köçläreneñ berläşüe zarur. Törkiyä belän Azärbaycan arasında “TURAZ börkete - 2016” xärbi künegüläre ağımdağı yılnıñ 7-25 mart könnärendä Konyada uzdı. Kiläse könnärdä 3 nçe Törkiyä – Azärbaycan saqlanu sänäğäte xezmättäşlege cıyılışı ütkäreläçäk. Azärbaycannıñ Törkiyägä qarata jestın başqa törki cömhüriyätlärdän dä kötep qalabız.