Awraziya kiñlegendä 09

Ağımdağı yılnıñ 19 nçı fevralendä Gruziya başqalası Tbilisida Törkiyä –Azärbaycan-Gruziya tışqı eşlär ministrlarınıñ öç yaqlı cıyılışı uzdı. Cıyılışta Törkiyä tışqı eşlär ministrı Mävlüt Çavuşoğlu,Azärbaycan tışqı eşlär ministrı Älmar Mämmädyarov häm Gruziya tışqı eşlär ministrı Mixail Janalidze qatnaştı.

Öç yaqlı cıyılışta ministrlar regional xezmättäşlek häm il mänfäğätlären qızıqsındıruçı mäs'älälär xaqında fiker alıştı. Baqı-Tbilisi-Cäyhan,Baqı-Tbilisi-Ärzurum ürtkärgeçläre,Baqı-Tbilisi-Kars timer yulı häm Trans Anadolu tabiği gaz proyektı mäs'äläläre qaraldı.

Tbilisida uzğan 5 nçe Törkiyä –Azärbaycan-Gruziya tışqı eşlär ministrları cıyılışı azağında urtaq belderge imzalandı. Urtaq beldergedä yaqlarnıñ regional tınıçlıq,iminlek häm totrıqlılıqnı nığıtudağı urtaq teläkläre citkerelde häm öç yaqlı cıyılışlardan qanäğät qaluları belderelde. Beldergedä Änkara häm Diyarbakırdağı terror höcümnäre dä ğayeplände.

Töbäk aşa uzaçaq ütkärgeçlärneñ tögällänüenä tulısınça yaqlaw kürsätelgän beldergedä tarixi Yefäk yulın canlandırunı 3 ilneñ dä teläwe, bu bäyläneştä Baqı-Tbilisi –Kars timer yulın qısqa waqıt eçendä tögälläwne maqsat itep quyularına basım yasaldı.

Urtaq beldergedä 2013-2015 nçe yıllar öçen küzdä totılğan öç yaqlı tarmaq ğamäl planında urın alğan proyektlarnı tormışqa aşırudan illärneñ qanäğät buluları belderelde. Beldergedä şulay uq çirattağı öç yaqlı ministrlar cıyılışınıñ bıyıl Azärbaycanda ütkäreläçäge citkerelde.

Tışqı eşlär ministrları soñraq urtaq matbuğat oçraşuı ütkärde.Matbuğat oçraşuında çığış yasawçı Azärbaycan tışqı eşlär ministrı Älmar Mämmädyarov öç il arasındağı xezmättäşlekneñ qazanu printsibına kürä uñışlı räweştä däwam itüen assızıqladı. Törkiyä tışqı eşlär ministrı Mävlüt Çavuşoğlu terrorğa qarşı köräş mäs'äläsendä teläktäşlek ,tayanışu kürsätkän öçen kürşe illärgä räxmätlären citkerde.

Öç yaqlı oçraşularnıñ täwgese 2012 nçe yılnıñ 8 nçe iyünendä Trabzonda, ikençese 2013 nçe yılnıñ 28 nçe martında Batumida ,öçençese 2014 nçe yılnıñ 19 nçı fevralendä Gäncädä,dürtençese 2014 nçe yılnıñ 10 nçı dekabrendä Karsta uzğan ide. Törkiyä –Azärbaycan-Gruziya tışqı eşlär ministrları uzğan yıl cıyılmadı,ämma öç yaqlı cıyılışlarnıñ qısası kiñäyde. Mäsälän, 2016 nçı yılnıñ 6 nçı martında Gruziyanıñ Batumi qalasında öç ilneñ iqtisad ministrları Eş forumı qısasında küreşep söyläşte. 2015 nçe yılnıñ 2 nçe aprel häm 17 nçe dekabr könnärendä öç ilneñ saqlanu ministrları Tbilisi häm İstanbulda oçraştı. 2015 nçe yılnıñ 5 nçe mayında Änkarada ğomum ştab başlıqları cıyılışı ütkärelde. Öç ilneñ Könyaq gaz koridorı kiñäşmä şurasınıñ berence cıyılışı Baqıda uzdı. Trans Anadolu tabiği gaz ütkärgeçenä(TANAP) nigez salu tantanası Karsta ütkärelde.

Mondıy öç yaqlı cıyılışlar däwlät başlıqları däräcäsendä dä däwam itärgä tiyeş. Belüebezçä, 2014 nçe yılnıñ 6 nçı mayında Tbilisida Azärbaycan, Gruziya häm Törkiyä ilbaşlarınıñ öç yaqlı oçraşuı uzdı.

Töbäktä mondıy xezmättäşleklär buluğa qaramastan qayber problemalar da bar. Gruziya häm Azärbaycan çikläreneñ açıqlanuı,diasporalarnıñ qıyınlıqları, mäsxät törekläreneñ Gruziyadağı töp Watannarına kire qaytuı kebek problemalar çişeleş kötä. Bu xezmättäşlek barlıq problemalarnı çişügä öleş kerter dip ışanıp qalabız.

Törekçädän tatarçağa Gölgenä Näfis tärcemäse