Awraziya kiñlegendä 05

Ağımdağı yılnıñ 21-22 ğinwar könnärendä Törkiyä başqalası Änkarada Törkiyä-Qırğzstan säwdä häm investitsiya forumı uzdı. Forum açılışında Qırğızstan Cömhüriyäte iqtisad minstrı Arzıbek Kocoşev,Törkiyä Cömhüriyäte tamğaxanä häm säwdä ministrı Bülänt Tüfänkci,Törkiyä palatalar häm birjalar Berlege başlığı Rıfat Hisarcıklıoğlu ,Qırğızstan säwdä häm sänäğät palataları Berlege başlığı Marat Şarşekeev häm Qırğızstannıñ Änkaradağı tulı wäqalätle ilçese İbragim Cunusov qatnaşıp çığış yasadı. Forumda 150se Qırğızstannan bulu belän bergä 400 dän kübräl eşmäkär qatnaştı.

Törkiyä Cömhüriyäte tamğaxanä häm säwdä ministrı Bülänt Tüfänkci forum açılışında yasağan çığışında Qırğızstannıñ Urta Aziyadağı törki cömhüriyätlär arasında eksportı bik tiz artqan il buluın belderde. Törkiyä palatalar häm birjalar Berlege başlığı Hisarcıklıoğlu isä Qırğızstannıñ Qıtaynıñ alternativa kiçü yulı östendä urın aluınıñ iskitkeç forsat buluın citkerde.

Açılış çığışlarınnan soñ Qırğızstan säwdä häm sänäğät palataları Berlege Törkiyä palatalar häm birjalar Berlege,Yaqın Könçığış sänäğät häm säwdä üzäge , waq häm urta külämle eşxanälärne üsterü häm alarğa yaqlaw kürsätü idaräse belän xezmättäşlek kileşüläre imzaladı.

21-22 nçe ğinwar könnärendä Qırğızstan eşmäkärläre Törkiyä eşmäkärkläre belän ike yaqlı söyläşülär ütkärde. Älege söyläşülärdä ike yaqlı kileşülär tä'min itelde.

Törkiyä – Qırğızstan säwdä häm investitsiya forumı qısasında Qırğızstan eşmäkärlärenä waq häm urta külämle eşxanälärne üsterü häm alarğa yaqlaw kürsatü idaräse belän Yaqın Könçığış sänäğät häm säwdä üzäge xaqında kiñ qırlı mäğlümat birelde.

Xäzerge waqıtta Qırğızstanda 300 tiräse Törkiyä şirkäte, Törkiyädä isä 100 dän kübräk Qırğızstan şirkäte törle tarmaqlarda eşçänlek başqara. Törkiyädän Qırğızstanğa nigezdä sänäğät eşlänmäläre, Qırğıstannan Törkiyägä isä kübräk awıl xucalığı eşlänmäläre importlana.

Änkarada uzğan Törkiyä –Qırğızstan säwdä häm investitsitya forumı küp cähättän zur ähämiyätkä iyä. Bu qısada berence tapqır Qırğızstannan Törkiyägä 100 dän kübräk eşmäkär törkeme kilde. Bu isä ike yaqlı iqtisadi mönäsäbätlärneñ yaña däräcagä kütärelüen kürsatä. Eşmäkärlär törkemeneñ Törkiyä palatalar häm birjalar Berlege, waq häm urta külämle eşxanälärne üsterü, alarğa yaqlaw kürsätü idaräse ,Yaqın Könçığış sänäğät häm säwdä üzäge xaqında centekle mäğlümat alıp ,oyışmalar belän tanışuı häm Qırğızstan citäkçelegeneñ bu oyışmalarnı ilendä buldıru teläge ike yaqlı häm regional xezmättäşlek cähätennän bik möhim. 1 million 200 meñnän kübräk äğzası bulğan Törkiyä palatalar häm birjalar Berlege belän 5200 firmanı üz eçenä aluçı Yaqın Könçığış sänäğät häm säwdä üzäge barı tik Qırğızstan öçen genä tügel, böten töbäk illäre öçen ürnäk bulırlıq däräcädä. Qazaqstan berniçä yıl elek bu tarmaqarda Törkiyä belän tığız xezmättäşlekkä dä kereşte.

İran sanktsiyälärdän qotılğan, Rusiya-Törkiyä mönäsäbätläre kiyerenke tös alğan häm dönyada iqtisadi krizis däwam itkän bu könnärdä Urta Aziya illäreneñ Törkiyä belän mönäsäbätlären tağın da kamilläşterüe zarur. Törkiyä-Qırğızstan säwdä häm investitsiya forumınıñ başqa illärgä dä ürnäk buluın teläp qalabız.