په امریکا کې په یو سوداګریز مرکز وسله وال برید شوی
د امریکا د بویس په ښار کې په سوداګریز مرکز وسله وال برید شوی دی
د امریکا متحده ایالتونو د آیداهو ایالت په مرکز بویس کې په سوداګریز مرکز وسله وال برید شوی دی.
د بویس د ښار پولیسو خبري رسنیو ته ویلي دي چې پدې پیښه کې دوه تنه مړه او د یو تن پولیس په ګډون ۵ تنه نور ټپیان شوي دي.
د بویس د ښار د پولیسو مشر ریان لي وویل چې دا پيښه د ماسپخین د دوه نیمو بجو په شاوخوا کې رامنځته شوه.
هغه وویل چې پولیسو ددې پيښې په اړه د راپور د ترلاسه کولو نه وروسته سمدلاسه د پيښې ځای ته ورسیدل.
د پيښې ځای ته د رسیدو نه وروسته يي د برید کوونکي سره په نښته کې ښکیل شول.
پولیسو برید کوونکی ژوندی نیولی دی. پولیسو د برید کوونکي په اړه د لا زیاتو معلوماتو ورکولو نه ډډه کړې ده .
د پيښې په اړه تحقیقات دوام لري.
هغه وویل چې د برید انګیزه او د قربانیانو هویت تر اوسه پورې معلوم ندی. ټپیان روغتون ته انتقال شوي او د درملنې لاندې نیول شوي دي.