د کولمبیا د ولسمشر په چورلکې وسله وال برید شوی

د کولمبیا د مقاماتو په وینا د ولسمشر دوکه پر هیلیکوپټر د هیواد شمال ختیځ کې د کاتاتومبو سیمې ته د سفر پر مهال په لاره کې وسله وال برید شوی دی.

پدې برید کې ولسمشر دوکه او ورسره مل هیئت ته هیڅډول زیان ندی اوښتی.

ویل کیږي‌ د برید کوونکو د نیولو په خاطر پراخه عملیات پیل شوي‌ دي.

د کولمبیا ولسمشر ایوان دوکه د نوموړي هیواد د کوکوتا په سرحدي‌ ښار کې د چورلکې نه د ښکته کیدو نه سمدلاسه وروسته خبري‌ غونډه کې ګډون وکړ. هغه وویل چې چورلکه د ښکته کیدو پر حال کې وه چې پرې وسله وال برید وشو.

هغه وویل چې له نیکه مرغه پدې برید کې د هغه په ګډون هیچا ته زیان ندی اوښتی.

هغه وویل چې د چورلکې لوړ ظرفیت او کیفیت د یوې خونړۍ پیښې مخه ونیوله.

هغه وویل چې حقیقت دادی چې د ولسمشر په چورلکې برید شوی او د مرمیو نښې او نښانې پکې شتون لري.

هغه وویل چې دا ډول بریدونه د نشه يي توکو د قاچاق او وسله والو سازمانونو پر خلاف زمونږ د مبارزې مخه نیولی نشي . زمونږ مبارزه به د قوي‌ ارادې سره دوام وکړي.