د تونس ولسمشر پارلمان فسخه او لومړی وزیر له دندې ګوښه کړ
د تونس ولسمشر قیس سعید د ۳۰ ورځو لپاره د پارلمان ټول صلاحیتونه فسخه کړل او د وکیلانو و مسئونیت حق يي وځنډو.
د تونس ولسمشر قیس سعید لومړی وزیر هاشم المیشیشي له دندې ګوښه کړ او ویلي دي چې د هغه پر ځای به پخپله لومړی وزیر وټاکي او صلاحیتونه به ورته ورکړي. همداشان ولسمشر ویلي دي چې په هیواد کې اداري فساد او ترسره شوو بډو د رابرسیره کولو په خاطر به پخپله د لوی څارنوال دنده هم په غاړه واخلي.
د تونس ولسمشر دا پریکړه د پوځ د قومندانانو او امنیتي اداراتو د مسئولینو سره د لیدنې نه وروسته د یو ویدیويي پیغام له لارې اعلان کړه.
هغه په خپور کړي پيغام کې ددې خبرې په ټینګار ویلي دي چې تونس تالان ، چور او چپاول د اور په لمبو کې سوځي. هیواد ددې وضعیت نه د ژغورولو په خاطر ځینو بیړنیو تدابیرو ته مجبور شو.
هغه د نوم په نه اخیستو سره وویل چې ځیني ډلې د هیواد په بعضو سیمو کې د کورنۍ جګړې د رامنځته کولو په خاطر پيسې راټولوي.
هغه وویل دا تدابیر باید یو څو میاشتې مخکې نیول شوي وای. د تدابیرو تصمیم د پارلمان د رئیس رشید الغنوشي او لومړي وزیر هاشم المشیشي سره د سلامشورو نه وروسته نیول شوی دی.
هغه ویلي دي چې ددې پریکړې په چوکاټ کې د پارلمان ټول صلاحیتونه د ۳۰ ورځو لپاره فسخه کولو او د وکیلانو د مسئونیت حقونه د ځنډولو پریکړه کړې . موجود لومړی وزیر هاشم المشیشي له دندې ګوښه کړی او پر ځای يي د نوي لومړي وزیر د ټاکلو پریکړه کړې ده . همداشان ولسمشر ویلي دي چې د یو فرمان په صادرولو سره به دا پریکړې او تصامیم سمدلاسه عملي او نافذ کړي.
د ویلو ده چې په تونس کې ټول هوايي ډګرونه او سرحدي دروازې تړل شوي دي.
پوځ د بعضو سیاسینو په نیولو پيل کړی دی.
د تونس د پارلمان رئیس الغنوشي د ولسمشر ددې پریکړو نه د ښکاره کودتا په توګه یادونه کړې ده .
الغنوشي په خپلو پلویانو غږ کړی دی چې تونس به په مصر ثاني او قیس سید ته به اجازه ورنکړي چې د سیسي په څیر د کودتا له لارې واک او اختیار په لاس کې واخلي.
هغه ویلي دي چې هیڅوک په ډیموکراتیکه توګه انتخاب شوي پارلمان د فسخه کولو او لومړي وزیر له دندې نه د ګوښه کولو صلاحیت نلري. پارلمان او لومړی وزیر بر حاله دي.
الغنوشي یو ځل بیا د تونس خلک د ډیموکراسۍ د ټینګښت او تاسیس په خاطر سوله ایزو مظاهرو او مبارزې ته راوبلل.
د بله پلوه د تونس د ولسمشر لخوا د پریکړو د اعلانولو نه وروسته په ځینو سیمو کې خلک لارو او کوڅو ته راوتلي او خوښۍ تظاهرات کوي.
د ویلو ده چې په تیرو میاشتو کې په تونس کې د حکومت او مخالفو ګوندونو پر خلاف پراخه مظاهرې شوې وې او خلکو په ځانګړې توګه د واکمن ګوند پر مرکزونو بریدونه کړي وو.