Мевлүт Чавушоглу Москвада өтө турган төрттүк саммит тууралуу билдирди
Чавушоглу бир телекөрсөтүү каналында күн тартибине баа берип, 10-майда Москвада Түркия, Россия, Иран жана Сириядагы Асад режиминин тышкы иштер министрлеринин деңгээлинде өткөрүлө турган төрт тараптуу саммитке токтолду.
Тышкы иштер министри Мевлүт Чавушоглу Россиянын борбор шаары Москвада өтө турган төрт тараптуу саммитте Түркиядагы сириялык баш калкалоочулардын коопсуз түрдө өз өлкөлөрүнө кайтуулары жана бул үчүн керектүү негиздин даярдалышы сыяктуу маселелердин карала турганын билдирди.
Министр Чавушоглу бир телекөрсөтүү каналында күн тартибине баа берип, 10-майда Москвада Түркия, Россия, Иран жана Сириядагы Асад режиминин тышкы иштер министрлеринин деңгээлинде өткөрүлө турган төрт тараптуу саммитке токтолду.
Түркия террордон тазаланган Сириянын түндүгүндөгү аймактарга 550 миң сириялык баш калкалоочунун кайтып барганын эске салган Чавушоглу, калганын жөнөтүү үчүн БУУ жана Европа Биримдиги, Асад режими менен кызматташтыктын зарылдыгын белгиледи.
Чавушоглу сириялык баш калкалоочулардын мүмкүнчүлүктөрдүн алкагында пландын негизинде акырындык менен өлкөлөрүнө кайтарылышы керектигин айтты.
Асад режиминин сириялыктардын өлкөлөрүнө кайтарылышы үчүн мурда мунапыс жарыялаганын эске салган Чавушоглу, бул кайтуу процессинин БУУ менен кызматташтыкта жана ачык түрдө жүргүзүлүшү керектигин белгилеп : «Режим жалпысынан сириялыктардын кайтып келишин каалайт, бирок сириялыктардын кайтып келиши үчүн коопсуздугу жана алардын муктаждыктары канааттандырылабы деген маселе бар. Учурда режим аларды камсыздай албайт»,- деди.
