«Әлішер Науаи жылы» жарияланды

Халықаралық Түркі академиясы  түркі әлемінің түғырлы тұлғасы, кемеңгер ойшыл, абыз ақын Әлішер Науаидың туғанына 580 жыл толуына орай  «Шығыстың жарық жұлдызы» атты шара өткізді.

Түрік тілі жылы аясында ұйымдастырылған алқалы жиынға Халықаралық Түркі академиясының президенті Дархан Қыдырәлі, Өзбекстан Республикасының Қазақстан Республикасындағы Төтенше және өкілетті Елшісі Саидикрам Ниязходжаев, ҚР Парламенті Мәжілісінің депутаты Фахриддин Каратаев, С.Сейфуллин музейінің директоры, ақын, аудармашы Несіпбек Айтұлы, Қазақстан Жазушылар Одағы Нұр-Сұлтан қалалық филиалының директоры Дәулеткерей Кәпіұлы, Әлішер Науаи атындағы Ташкент өзбек тілі және әдебиеті университетінің ректоры Шухрат Сирожиддинов, Мичиган университеті жанындағы Еуропа, Ресей және Еуразиялық зерттеулер орталығы директорының орынбасары, профессор Тимур Қожаоғлу, Өзбекстан Республикасының Мемлекеттік сыйлығының лауреаты, ақын, Өзбекстан Жазушылар одағының мүшесі, халық жазушы Мұхаммед Әли, Еуразия Жазушылар Одағының төрағасы Якуп Омероглу, Баку Ұлттық университеті әдебиет кафедрасының меңгерушісі, профессор Рамиз Аскер және түркі елдерінің белгілі мемлекет және қоғам қайраткерлері, танымал ғалымдар мен зиялы қауым өкілдері қатысты.

Онлайн/оффлайн режимде өткен жиынды жүргізіп отырған Академия басшысы Д.Қыдырәлі Әлішер Науаи жылы аясында атқарылатын шаралар мен арнайы жобаларды баяндап берді.  Сонымен қатар басқосуға қатысушылар Науаи мерейтойын атап өтудің маңыздылығына тоқталып, ұлы шайырдың шығармашылығы туралы орамды ойларымен бөлісті.

Хабар мен фотосурет Түркі академиясының баспасөз қызметінен алынды.