Анкарада Білге Тоныкөк жазба ескерткішінің көшірмесі орнатылды

Ескерткіштің салтанатты ашылуы болып өтті.

1588688
Анкарада Білге Тоныкөк жазба ескерткішінің көшірмесі орнатылды

 

Кеше Халықаралық Түркі академиясы Анкарада ашылған «Түркі әлемі: Тоныкөк саябағы» аумағына Білге Тоныкөк жазба ескерткішінің көшірмесін орнатты.

Тарихи маңызы зор ескерткіштің ресми ашылу салтанатына Түркия Ұлы Ұлттық Мәжілісінің төрағасы Мұстафа Шентоп, Халықаралық Түркі академиясмының президенті Дархан Қыдырәлі, Түріксой ұйымының бас хатшысы Дүйсен Қасейінов, Анкара қаласы Алтындағ ауданының мэрі Асым Балжы, сонымен қатар бірқатар халықаралық ұйым басшылары, Түркияның белгілі мемлекет және қоғам қайраткерлері қатысты.

Түркия астанасының орталық ауданында орналасқан саябақ аумағына Моңғолиядағы Орхон өзенінің бойындағы VIII ғасырға жататын Тоныкөк жазба ескерткішінің Халықаралық Түркі академиясы әзірлеген дәлме-дәл көшірмесі қойылды.

Осылайша Халықаралық Түркі академиясы мен Алтындағ ауданының мэриясы «Түрік тілі жылына» және ЮНЕСКО аясында атап өтілген Тоныкөк ескерткішінің 1300 жылдық мерейтойына арналған маңызды шараға ұйытқы болды.

Ескерткіштің салтанатты ашылу рәсіміне қатысып, сөз сөйлеген Түркі академиясының президенті Дархан Қыдырәлі: «Өткен жыл Тоныкөк ескерткішінің 1300 жылдық мерейтойына орай Түркі әлемінің ортақ ұйымы Халықаралық түркі академиясының бастамасымен «Білге Тоныкөк жылы» деп жарияланған болатын. Тоныкөк жылы аясында ЮНЕСКО-мен бірлесе отырып ұйымдастырған көптеген іс-шаралар енді. Осы баянды бастама «Түркі әлемі: Тоныкөк саябағының» ашылуымен мағыналы жалғасын тапты деуге болады. Аталған бастаманың Түркия Республикасының Президенті Режеп Тайип Ердоған мырзаның қаулысымен жарияланған «Түрік тілі жылына» тұспа-тұс келуі де айрықша маңызды» деді.

 

Мәтін мен сурет Түркі академиясының баспасөз қызметінен алынды. 



Ұқсас жаңалықтар