Палестина мемлекетін тану керек

Бельгия премьер-министрінің орынбасары Петра Де Саттер Палестина мемлекетін жазға дейін тану керек деп мәлімдеді.

Де Саттер Испанияның жазға дейін Палестина мемлекетін тануды жоспарлағанын еске салып, елінің де осындай қадамға баруы керектігін мәлімдеді. «Біз тәуелсіз Палестина мемлекетін және оның Біріккен Ұлттар Ұйымына кіруге деген жаңа өтінішін ресми түрде мойындауымыз керек» деген ол Палестина халқының өз тағдырын айқындау құқығын пайдалана алуы керектігін баса айтты.

Бельгияның Сыртқы істер министрі Хаджа Лахбиб осы мәселеге қатысты мәлімдемелерінде «Палестина мемлекетін тану туралы келісім бар», бірақ бұл шешім «уақыты келгенде» жарияланатыны туралы мәлімдемелерін жиі қайталап келеді.

Испания, Ирландия, Мальта және Словения 22 наурызда «тиісті шарттар» орындалған кезде Палестина мемлекетін тануға дайын екендерін жариялаған еді.

Испания премьер-министрі Педро Санчес та сейсенбіде (2 сәуір) Палестина мемлекетін жазға дейін мойындайтынын мәлімдеген болатын.