აშშ-ში ხელისუფლება დამატებით ბიუჯეტს ითხოვს უკრაინის დასახმარებლად

ამერიკის შეერთებულ შტატებში პრეზიდენტ ჯო ბაიდენის ხეისუფლებამ მოითხოვა კონგრესისგან დამატებითი ბიუჯეტი, რათა დახმარება გაუგზავნოს რუსეთთან მეომარ უკრაინას.

თეთრი სახლის მართვისა და ბიუჯეტის დირექტორმა შალანდა იანგმა უკრაინაში გაგზავნილი დახმარების მდგომარეობაზე ისაუბრა წერილში, რომელიც მან წარმომადგენელთა პალატასა და სენატს გაუგზავნა.

აღნიშნულ წერილში იანგმა განაცხადა: „(რუსეთ-უკრაინის ომში) აღარ გვაქვს ფული უკრაინის მხარდასაჭერად“ და სთხოვს კონგრესს დაამტკიცოს დახმარებისთვის შეთავაზებული დამატებითი ბიუჯეტი.

იანგმა ხაზგასმით აღნიშნა, რომ აშშ-ს მიერ უკრაინაში იარაღისა და დახმარების გასაგზავნად გამოყოფილი ფონდი წლის ბოლომდე ამოიწურება და უკრაინის ეკონომიკის კოლაფსი ნიშნავს, რომ „მათ არ შეეძლებათ ომის გაგრძელება“.

ოქტომბერში ბაიდენის ხელისუფლებამ კონგრესს სთხოვა 105 მილიარდი დოლარის დამატებითი ფონდი, ძირითადად უკრაინისა და ისრაელის მხარდასაჭერად, ასევე აშშ-მექსიკის საზღვარზე უსაფრთხოების ზომების გასაძლიერებლად.

შეგახსენებთ, რომ 2022 წლის 24 თებერვალს რუსეთის პრეზიდენტმა პუტინმა უკრაინაში შეჭრის ბრძანება გასცა, რითაც რუსეთ-უკრაინის ომი დაიწყო.

პუტინმა თქვა, რომ ის მიზნად ისახავს ქვეყნის დემილიტარიზაციას და დენაციფიკაციას, რათა ხელი შეუშალოს კიევის ნატოში გაწევრიანებას და შეინარჩუნოს იგი რუსეთის გავლენის სფეროში.