სუდანში ჯარსა და სწრაფი მხარდაჭერის ძალებს შორის შეტაკებები 26 დღეა გრძელდება

სუდანის დედაქალაქ ხართუმში არმიასა და სწრაფი მხარდაჭერის ძალებს შორის შეტაკებები 26-ე დღესაც გაგრძელდა.

თვითმხილველების თქმით, სუდანის არმიის ძალებსა და სმძ-ს შორის სასტიკი შეტაკებები მოხდა დედაქალაქ ხართუმის ჩრდილოეთით ბაჰრის რეგიონში.

ძლიერი აფეთქებები და მძიმე არტილერიის ხმები ისმოდა ბაჰრის შამბატ ალ-არადის, შამბატ შამალის, საფიესა და ჰალფაიას რაიონებში და ჰაერში დაფრინავდნენ არმიის სამხედრო თვითმფრინავები.

დედაქალაქის სხვადასხვა რაიონში 26-ე დღესაც გრძელდებოდა შეტაკებები, საუდის არაბეთში ქალაქ ჯიდაში კი, ორ მხარეს შორის მოლაპარაკებებში პროგრესი ჯერ არ არის მიღწეული.

სმძ-მა განაცხადა, რომ ჩამოაგდო არმიის 2 სამხედრო თვითმფრინავი.

სუდანის არმიასა და სწრაფი მხარდაჭერის ძალებს შორის შეიარაღებული შეტაკებები 15 აპრილის დილით დაიწყო სუდანის დედაქალაქ ხართუმსა და სხვა ქალაქებში.

ჯარსა და სმძ-ს შორის უთანხმოება სამხედრო უსაფრთხოების რეფორმასთან დაკავშირებით დაიწყო, რომელიც ითვალისწინებს „სმძ-ს სრულ გაწევრიანებას ჯარში“ და ბოლო რამდენიმე თვეში ცხელ კონფლიქტში გადაიზარდა.

ჯანდაცვის მსოფლიო ორგანიზაციამ განაცხადა, რომ სუდანში არმიასა და სწრაფი მხარდაჭერის ძალებს შორის შეტაკების შედეგად დაღუპულთა რიცხვი 604-მდე, ხოლო დაშავებულთა რაოდენობა 5127-მდე გაიზარდა.