ფინეთი ხვალ ნატოს 31-ე წევრად გამოცხადდება

ნატოს გენერალურმა მდივანმა იენს სტოლტენბერგმა განაცხადა, რომ ხვალ ფინეთი 31-ე წევრად გამოცხადდება და მისი დროშა ნატოს შტაბ-ბინაში აღიმართება. სტოლტენბერგმა ნატოს საგარეო საქმეთა მინისტრების შეხვედრამდე, რომელიც 4-5 აპრილს, ბელგიის დედაქალაქ ბრიუსელში, ნატოს შტაბ-ბინაში ჩატარდება, პრესკონფერენცია გამართა.

მან აღნიშნა, რომ შეხვედრის პირველ დღეს ფინეთი 31-ე წევრად გამოცხადდება, მისი დროშა ნატოს შტაბ-ბინაში აღიმართება და რომ ეს ამ ქვეყანას უფრო უსაფრთხოს გახდის და ალიანსს გააძლიერებს.

სტოლტენბერგმა კიდევ ერთხელ გამოხატა სურვილი, რომ შვედეთმა რაც შეიძლება მალე დაასრულოს წევრობის პროცესი.

2022 წლის ივნისში გამართული მადრიდის სამიტის შემდეგ, ნატოს ქვეყნების უმეტესობამ დაიწყო ორივე ქვეყნის წევრობის დამტკიცების პროცესი.

ნატოს 20-მა ქვეყანამ რატიფიკაციის პროცესი პარლამენტებში ივლისში, 4-მა ქვეყანამ აგვისტოში და 4-მა კი სექტემბერში დაასრულა.

ბოლოს, 27 მარტს, უნგრეთის პარლამენტმა დაამტკიცა ფინეთის წევრობა, თურქეთის დიდმა ეროვნულმა მეჯლისმა კი 30 მარტს.

ამრიგად, ფინეთის ნატოში გაწევრიანების პროცესი ერთ წელზე ნაკლებ დროში დასრულდა, რაც ალიანსის 74-წლიან ისტორიაში ერთ-ერთი ყველაზე სწრაფად პროგრესირებული პროცესია.