ჯო ბაიდენი: „ამერიკა ნატოს ტერიტორიების თითოეულ სანტიმეტრს დაიცავს“

ამერიკის შეერთებული შტატების პრეზიდენტმა ჯო ბაიდენმა განაცხადა: „ამერიკა ნატოს ტერიტორიების თითოეულ სანტიმეტრს დაიცავს“.

მან ამის შესახებ, პოლონეთში, „ბუქარესტის ცხრიანის“ ლიდერებთან შეხვედრაზე განაცხადა. ბაიდენმა აღნიშნა, რომ იგი ძლიერ მოკავშირეებთან ერთად ყოფნის გამო ძალიან ბედნიერია რა, ნატოს გენერალურმა მდივანმა იენს სტოლტენბერგმა დღემდე „შესანიშნავი სამუშაოები შეასრულა“.

„დღეს, როდესაც ვუახლოვდებით რუსეთის უკრაინაში შეჭრის პირველ წლისთავს, კიდევ უფრო მნიშვნელოვანია, რომ გავაგრძელოთ ერთად დგომა და ვფიქრობ, ეს იმის დასტურია, თუ რამდენად ძლიერად ვგრძნობთ თავს. თქვენ (აღმოსავლეთის ფლანგის ქვეყნები) ხართ ჩვენი კოლექტიური თავდაცვის წინა ხაზზე. ეს კონფლიქტი მნიშვნელოვანია დემოკრატიის თავისუფლებისთვის არა მხოლოდ უკრაინაში, არამედ მთელ ევროპაში და მსოფლიოში. უკრაინის უსაფრთხოების მხარდაჭერა, ფაქტიურად მილიონობით ლტოლვილის მხარდაჭერაა. ჩვენ გავაგრძელებთ უკრაინის გვერდში დგომას. ნატოს მეხუთე მუხლი წმინდა ვალდებულებაა. ასე, რომ ჩვენ დავიცავთ ნატოს ფაქტიურად ყველა სანტიმეტრს,“ განაცხადა ჯო ბაიდენმა.

შეხვედრაზე ნატოს გენერალურმა მდივანმა იენს სტოლტენბერგმა კი განაცხადა: „რუსეთის პრეზიდენტი ვლადიმერ პუტინი არ ემზადებოდა მშვიდობისთვის. პირიქით, ის ემზადება უფრო მეტი ომისთვის. ამიტომ, ჩვენ უნდა გავაგრძელოთ და გავზარდოთ მხარდაჭერა უკრაინის მიმართ. ჩვენ უნდა მივცეთ უკრაინას ის, რაც მას სჭირდება გამარჯვებისთვის“.

ცნობისათვის, „ბუქარესტის ცხრიანი“ (ბულგარეთი, ჩეხეთი, ესტონეთი, უნგრეთი, ლატვია, ლიეტუვა, პოლონეთი, რუმინეთი და სლოვაკეთი), რომელიც ნატოს აღმოსავლეთ ფრთის ქვეყნების ნაწილია, 2015 წლის 4 ნოემბერს რუმინეთის დედაქალაქ ბუქარესტში შეიქმნა.