ინდონეზიაში 7.1 მაგნიტუდის სიმძლავრის მიწისძვრა მოხდა

ინდონეზიაში ჩრდილოეთ სულავესის პროვინციის ტალაუდის კუნძულების ღია წყლებში 7,1 მაგნიტუდის სიმძლავრის მიწისძვრა მოხდა.

მიწისძვრა, რომლის ეპიცენტრიც ტალაუდის კუნძულების მელონგუანეს რეგიონის ჩრდილო-აღმოსავლეთით 134 კილომეტრის დაშორებით მდებარეობდა, მიწის ზედაპირიდან 154 კილომეტრის სიღრმეში დაფიქსირდა.

მეტეოროლოგიის, კლიმატისა და გეოფიზიკის ორგანიზაციას მიწისძვრის შემდეგ ცუნამის განგაში არ გამოუცხადებია და დაღუპულების ან დაშავებულების შესახებ ინფორმაცია ჯერ-ჯერობით არ გაუვრცელებია.

ინდონეზიაში 2018 წლის 28 სექტემბერს კუნძულ სულავესის პალუს ყურეში მომხდარ 7,5 მაგნიტუდის სიმძლავრის მიწისძვრას და შემდგომ წარმოქმნილ ცუნამს დონგალას, პალუს და სიგის რეგიონებში 4 ათას 340 ადამიანი ემსხვერპლა.