“Türkiyə özünümüdafiə hüququndan istifadəyə davam edəcək”, S.Önal

  Türkiyənin Birləşmiş Millətlər Təşkilatındakı daimi nümayəndəsi səfir Sedat Önal terror təşkilatlarının milli təhlükəsizliyə birbaşa və gözlənilən təhdidlərə qarşı BMT Təhlükəsizlik Şurasının qətnamələrinə uyğun olaraq Türkiyənin özünümüdafiə hüququndan istifadə etməyə davam edəcəyini bildirib.

  BMT Təhlükəsizlik Şurasında keçirilən Suriya sessiyasında çıxışında Türkiyə səfiri deyib: “BMT Baş Assambleyasının 78-ci iclasında ölkə başçıları beynəlxalq sülh və təhlükəsizliyə təsir edən mövzuları müzakirə etdilər, lakin 12 illik Suriya böhranına lazımi prioritet verilmədi. Suriyada aktiv qarşıdurmalar hələ də davam edir. Cəmiyyətdə vəziyyət pisləşib. Ölkə dərin iqtisadi məhrumiyyət və humanitar böhranla üz-üzədir. Fevral ayında baş verən zəlzələlər vəziyyəti daha da ağırlaşdırıb. Münaqişənin başlanğıcından bu yana yüz minlərlə adam həyatını itirib. Milyonlarla insan evlərini tərk etmək məcburiyyətində qalıb. Eyni dərəcədə narahatedici bir məsələ ölkənin ərazi bütövlüyünün ilk növbədə PKK/YPG kimi terror təşkilatları tərəfindən təhdid altında olmasıdır.

  Suriya böhranının hərtərəfli həlli üçün eyni vaxtda atılmalı addımlar var: BMT Təhlükəsizlik Şurasının 2254 saylı qətnaməsinə uyğun olaraq siyasi prosesi canlandırmaq, terror təşkilatlarının şər və separatçı gündəmlərini pozmaq, Suriyanın ərazi bütövlüyünü və birliyini qorumaq, suriyalı qaçqınların təhlükəsiz, könüllü və ləyaqətlə qayıtmaları üçün şəraitin yaradılması.

  Suriyada terror təşkilatlarının mövcudluğu həm ölkə, həm qonşuları - Türkiyə və bölgə üçün böyük təhlükə yaradıb. Bütün tərəfləri Suriyanın gələcəyində yeri olmayan bu separatçı birləşmələrlə vahid və uzunmüddətli bir yanaşma ilə əlaqələri kəsməyə çağırırıq.

  Türkiyənin Suriyada fəaliyyət göstərən terror təşkilatları tərəfindən milli təhlükəsizliyinə birbaşa və gözlənilməz təhdidlərə qarşı lazımi tədbirlər görmək hüququ var. BMT Nizamnaməsinin 51-ci maddəsinə və BMT Təhlükəsizlik Şurasının müvafiq qətnamələrinə uyğun olaraq Türkiyə özünümüdafiə üçün bütün haqqlarını həyata keçirməyə davam edəcək.