Dünya Qastroenteroloqlarının XX Beynəlxalq Bakı Konqresi

  Dünya Qastroenteroloqlarının XX Beynəlxalq Konqresi öz işinə başlayıb. Odlar yurdu Azərbaycanın paytaxtı Bakı şəhəri 8-ci dəfədir Beynəlxalq Avrasiya Cərrahlar və Qastroenteroloqlar Konqresinə, eyni zamanda XX Beynəlxalq Hepatoqastroenterologiya Konqresinə ev sahibliyi edir.

  Azərbaycan Respublikası Səhiyyə Nazirliyinin dəstəyi, akademik Mustafa Topçubaşov adına Elmi Cərrahiyyə Mərkəzi, Milli Onkologiya Mərkəzi, Azərbaycan Tibb Universiteti, Azərbaycan Cərrah və Qastroenteroloqlar İctimai Birliyi, Avrasiya Qastroenteroloqlar Assosiasiyası, Türkiyə Respublikası Hepato Bilio Pankreatologiya (HeBiPA) və Türkiyə Qaraciyər Araşdırmaları (TASL) assosiasiyalarının birgə təşkilatçılığı ilə keçirilən mötəbər tədbir dünyanın 30-dan çox ölkəsini təmsil edən 200-dən çox alim, tanınmış həkim və cərrahı, akademik qurumların nümayəndələrini öz ətrafında toplayıb.

  Konqres iştirakçıları əvvəlcə Fəxri Xiyabanda müasir Azərbaycanın qurucusu, ölkədə səhiyyə və tibb elminin inkişafında müstəsna xidmətləri olan ümummilli lider Heydər Əliyevin məzarını ziyarət edib, xatirəsinə hörmət və ehtiramlarını bildiriblər. Ulu öndərin ömür-gün yoldaşı, görkəmli oftalmoloq-alim, akademik Zərifə Əliyevanın da xatirəsi ehtiramla anılıb, məzarı üzərinə əklil düzülüb.

  Üç gün davam edəcək beynəlxalq Konqresin açılış mərasimi Azərbaycan və Türkiyə respublikalarının dövlət himninin səsləndirilməsi ilə başlayıb. 

  Konfransın açılış mərasimində Azərbaycan Respublikası səhiyyə nazirinin müavini Nadir Zeynalov, Milli Məclisin Səhiyyə Komitəsinin sədr müavini Rəşad Mahmudov, Heydər Əliyev Fondunun departament rəhbəri, millət vəkili Soltan Məmmədov, Azərbaycan Cərrah və Qastroenteroloqlar İctimai Birliyinin, həmçinin beynəlxalq konqresin sədri professor Rauf Ağayev, Azərbaycan Tibb Universitetinin rektoru, professor Gəray Gəraybəyli çıxış edərək Beynəlxalq Avrasiya Cərrahlar və Qastroenteroloqlar Konqresinin yaranma tarixindən bəhs edib, ümummilli lider Heydər Əliyevin dəstəyi ilə 1997-ci ildə Bakıda ilk dəfə keçirilən beynəlxalq konqresi xatırladıblar.

  Natiqlər XX Beynəlxalq Avrasiya Cərrahlar və Qastroenteroloqlar Konqresi və 20-ci Beynəlxalq Hepatoqastroenterologiya Konqresinin bu il öz ərazi bütövlüyünü tamamilə bərpa etmiş Azərbaycanda keçirilməsindən duyduqları qürur və sevinci iştirakçılarla paylaşaraq növbəti dəfə Qarabağın ürəyi Xankəndi və mədəniyyət beşiyi Şuşada keçirilməsini arzu etdiklərini dilə gətiriblər.

  Açılış mərasimində çıxış edən HEBİPA-nın sədri Halə Gökcan, Birləşmiş Avropa Qastroenteroloqlarının sədri Matias Löhr, Avropa Qaraciyər Araşdırma Assosiasiyasının baş katibi cənab Aleksandr Kraq, Ankara Universiteti Tibb fakültəsinin dekanı Zəhra Aycan, Hacettepe Universiteti Tibb fakültəsinin dekanı Deniz Demiryürek və digər xarici qonaqlar geniş coğrafi areala malik olan beynəlxalq konqresin növbəti dəfə Bakıda keçirilməsindən məmnunluq duyduqlarını, Azərbaycan alim və həkimlərinin dünya tibb elminə verdikləri töhfələrdən danışıblar.

  Sonra odlar yurdu Azərbaycandan bəhs edən video çarx nümayiş olunub.

  XX Beynəlxalq Avrasiya Cərrahlar və Qastroenteroloqlar Konqresi və 20-ci Beynəlxalq Hepatoqastroenterologiya Konqresi öz işini plenar sessiyalarla davam etdirib.

  Xatırladaq ki, aprelin 27-dək davam edəcək beynəlxalq konqresə 400-dən çox yerli və xarici mütəxəssislər qatılıb. Beynəlxalq Avrasiya Cərrahlar və Qastroenteroloqlar Konqresi və XX Beynəlxalq Hepatoqastroenterologiya Konqresi Azərbaycan Respublikası Səhiyyə Nazirliyinin Elmi Tibbi Şurası tərəfindən akkreditasiya olunub və 30 DTT kredit balı ilə qiymətləndirilib.