Co Bayden vә Benyamin Netanyahu arasında telefon danışığı olub

ABŞ prezidenti Co Bayden İsrailin baş naziri Benyamin Netanyahuya Qəzzada dərhal atəşkəsin təmin edilməsini və İsrailin gecikmədən razılığa gəlməsinin vacibliyini vurğulayıb.

Ağ Evdən verilən yazılı açıqlamaya görə, ABŞ prezidenti Co Bayden İsrailin baş naziri Benyamin Netanyahu ilə telefon əlaqəsi saxlayıb və Qəzzadakı son hücumları müzakirə edib.

Co Bayden görüşdə ''World Central Kitchen'' (WCK) adlı beynəlxalq yardım təşkilatının 7 əməkdaşının İsrail tərəfindən öldürülməsini gündəmə gətirərək, WCK və bölgədə fəaliyyət göstərən humanitar yardım təşkilatlarına edilən hücumların və Qəzzadakı humanitar vəziyyətin qəbuledilməz olduğunu vurğulayıb.

İsraildən mülki itkilər, humanitar vəziyyət və humanitar yardım əməkdaşlarının müdafiəsi ilə bağlı konkret və lazımi addımlar atmasını gözlədiklərini qeyd edən Co Bayden Qəzzada humanitar vəziyyəti yaxşılaşdırmaq və günahsız mülki insanları qorumaq üçün təcili atəşkəsin zəruliliyini  qeyd edib.