Beynəlxalq Əfv Təşkilatı: "Sudanda mülki insanlar ağlasığmaz dəhşət yaşayırlar"

Beynəlxalq Əfv Təşkilatı bildirib ki, aprelin ortalarından bəri hərbçilər və Çevik Dəstək Qüvvələri arasında şiddətli döyüşlərin getdiyi Sudanda dinc sakinlər "hər gün ağlasığmaz dəhşət yaşayırlar".
Beynəlxalq Əfv Təşkilatının "Ölüm Evimizə Gəlib: Sudanda Müharibə Cinayətləri və Mülki Əzablar" adlı hesabatında müharibə edən tərəflərin qəsdən və ayrı-seçkilik etmədən hücumlarının kütləvi mülki itkilərlə nəticələndiyi bildirilib.

Hesabatda qadınlara və qızlara qarşı cinsi zorakılığın təfərrüatları, xəstəxana və kilsə kimi mülki strukturlara planlaşdırılan hücumlar və irimiqyaslı talanların təfərrüatları da paylaşılıb.

Hesabatda Beynəlxalq Əfv Təşkilatının Baş katibi Aqnes Kallamardın mövzuya dair bu bəyanatı da yer alıb:

"Sudanda Çevik Dəstək Qüvvələri və Sudan Silahlı Qüvvələri əraziyə nəzarət uğrunda döyüşərkən hər gün dinc sakinlər ağlasığmaz dəhşət yaşayır. İnsanlar evlərində və ya ümidsizcə yemək, su və dərman axtararkən öldürülür. Onlar qaçarkən atəş altında qalır və planlı hücumlarda qəsdən vurulurlar".

Qadınlar və bəzilərinin hələ 12 yaşı olan onlarla qız döyüşən tərəflərin üzvləri tərəfindən cinsi zorakılığa, o cümlədən zorlamaya məruz qalıb.

Qeyd edək ki, Sudan ordusu bir vaxtlar dəstəklədiyi, lakin müstəqil və paralel ordu kimi fəaliyyət göstərdiyi üçün təhdid hesab etdiyi Çevik Dəstək Qüvvələrinin (HDK) 2 il ərzində tam şəkildə orduya inteqrasiyasını istəyirdi.

HDK-nın mülki hökumətdən təxminən 10 il sonra bunu qəbul edə biləcəyini bəyan etməsi ilə başlayan söz savaşı və gərginlik 15 aprel səhər saatlarında Xartum və müxtəlif şəhərlərdə tərəflər arasında silahlı qarşıdurmaya çevrildi. 

Münaqişədə əksəriyyəti mülki şəxslər olmaqla 3000-dən çox insan həlak olub, on minlərlə insan yaralanıb.

Birləşmiş Millətlər Təşkilatı Sudanda 100 gündən artıqdır davam edən qarşıdurma səbəbindən təxminən 4 milyon insanın didərgin düşdüyünü açıqlayıb.