İran ABŞ-ın İordaniyadakı bazasına hücumla əlaqəsinin olmadığını bildirib

İranın Birləşmiş Millətlər Təşkilatındakı (BMT) Nümayəndəliyi "Suriya-İordaniya sərhədində ABŞ qüvvələrinə hücumla heç bir əlaqəsi olmadığını" açıqlayıb.
İranın rəsmi xəbər agentliyi İRNA ölkənin BMT-dəki nümayəndəliyinin bəyanatına yer verib.

"İranın bu hücumla heç bir əlaqəsi yoxdur. Münaqişə ABŞ qüvvələri ilə regiondakı müqavimət qüvvələri arasında qarşılıqlı cavabdır", - bəyanatda deyilib.

Qeyd edək ki, ABŞ Prezidenti Co Bayden İordaniya-Suriya sərhədindəki hərbi bazaya pilotsuz təyyarənin birtərəfli hücumu nəticəsində 3 əsgərinin həyatını itirdiyini açıqlayıb. ABŞ Mərkəzi Komandanlığı (CENTCOM) da hücumda 34 əsgərin yaralandığını bildirib.

İordaniya hökuməti ABŞ qüvvələrinə hücumun ölkə ərazisində deyil, Suriya sərhədindəki Tenef bazasında həyata keçirildiyini açıqlayıb.