Սալիվան․ Թուրքիայի, Շվեդիայի և Ֆինլանդիայի ՆԱՏՕ-ին անդամակցելու մտահոգությունները կլուծվեն
ԱՄՆ-ի ազգային անվտանգության հարցերով խորհրդական Ջեյք Սալիվանը հայտարարել է, որ իրենք կարծում են, որ ՆԱՏՕ-ին անդամակցելու վերաբերյալ Թուրքիայի, Շվեդիայի և Ֆինլանդիայի մտահոգությունները կլուծվեն, և խնդրո առարկա երկու երկրները կլինեն դաշինքի թեկնածուներ։
Ջեյք Սալիվանը մասնակցել է «Նոր ամերիկյան անվտանգության կենտրոնի (CNAS)» կազմակերպած պանելին և պատասխանել ԱՄՆ արտաքին քաղաքականությանը վերաբերող հարցերին։
Շվեդիայի և Ֆինլանդիայի ՆԱՏՕ-ին անդամակցելու վերաբերյալ Թուրքիայի մտահոգությունների մասին հարցին Սալիվանը պատասխանել է հետևյալ կերպ․
«Ես ակնկալում եմ, որ Ֆինլանդիան և Շվեդիան կդառնան ՆԱՏՕ-ի անդամ, Թուրքիան իր մտահոգությունն է հայտնել ահաբեկչության և PKK-ի վերաբերյալ։ Ե՛վ շվեդները, և՛ ֆինները հայտարարել են, որ պատրաստ են արձագանքել Թուրքիայի մտահոգություններին: Շվեդներն ու ֆինները բարձր մակարդակի բանակցություններ են վարում Թուրքիայի նախագահ Ռեջեփ Թայիփ Էրդողանի թիմի հետ»։
Սալիվանը հայտարարել է, որ մի քանի օր առաջ Եվրոպայում հանդիպել է նաև նախագահի մամուլի քարտուղար Իբրահիմ Քալինի հետ ու ասել․
«Ես չեմ կարող ձեզ հստակ ժամանակացույց տալ այս խնդիրների լուծման համար, բայց կարող եմ ասել, որ բոլոր կողմերը խոստացել են լուծումներ»։
