ایرانده 18 کیشی جان بیردی

ایرانده اقتصادی بحران و ایشسیزلیککه قرشی بولیب اوتیاتگن ناراضی چیلیک نمایشلری جریانیده جان بیرگن کیشی لرنینگ سانی 18 نفر گه کوتریلیب کیتدی. 

خودی منه شوو جان بیرگن کیشی لر آره سیده بیر پولیس هم موجود. 

ایران رادیو و تلویزیونی گه باغلیق یاش ژورنالستلر جمعیتی خبر آژانسی نینگ خبری گه کوره, اصفهان نینگ نجف آباد شهریده نمایشچی لر دن بیری نینگ خوفسیزلیک کوچ لری گه قره ته اوق اوزیشی عاقبتیده 4 پولیس یره لندی.

یره لنگن خودی منه شوو پولیس لر دن بیری ایسه کیین چه لیک جان بیردی. 

پنجشنبه کونی هیچ قنده ی بیر سیاسی حزب نینگ دعوتی بولمسدن مشهد ده اولکه ده گی اقتصادی وضعیت گه قرشی ناراضی چیلیک نمایش لری باشلب کیتگن ایدی. 

رژیم گه مخالفت نمایشلری گه ایله نیب کیتگن اوشبو ناراضی چیلیک نمایش لری ایران نینگ فرقلی شهر لریده دوام ایتماقده. 

ایران دولت تلویزیونی, قوراللی نمایشچی لرنینگ حربی مرکز لر نی قولگه کیریتیش گه حرکت ایتیاتگن لیگی نی بیلدیررایکن, خوفسیزلیک کوچلری نینگ مقاومت کورستیاتگن لیگی نی معلوم قیلدی. 

حاضرگی کونگه قدر قریب 400 نفر نظارت آستی گه آلینرایکن, بعضی منطقه لرده ایسه انترنت شبکه لری چیکله نیب قویلدی. 

ایران جمهوررئیسی حسن روحانی ایسه, رسمی انترنت سایتی آرقه لی بیرگن بیانات لریده, "تنقید و ناراضی چیلیک نمایشلری, تهدید ایمس, بلکه بیر فرصتدن عبارت.  اوغیری لر و قانون لر گه ضد حرکت ایتیاتگن کیشی لر گه خلق نینگ اوزی جواب بیره دی. خلقی میز, قانون و انسان لرنینگ طلب لری گه ضد شعار بیریاتگن و انقلاب نینگ ارزش لری نی حقارت ایته دیگن اقلیت گه نیمه قیلیشی نی یخشی بیله دی" دییه قید ایتدی.