ایران بیلن طالبان باشقرووی کیلیشیب آلدی

ایران ایچکی ایشلر وزیری احمد واحدی چیگره ده یوزبیرگن توقنه شوولرنینگ آرتیدن طالبان باشقرووی بیلن ملاقاتلر اوتکزگن لیکلرینی شونده ی بولیب معماگه ییچیم تاپگن لیکلرینی و چیگره ده خوفسیزلیک نینگ تامین ایتیلگن لیگینی ایتدی.

ایران دولت تلویزیونی گه بیانات بیرگن ایچکی ایشلر وزیری واحدی، ایران چیگره محافظلری بیلن طالبان کوچلری اورته سیده توناون کونی سیستان – بلوچستان ایالتی گه باغلیق خرمند تومنیده گی چیگره ده ساسولی حربی مرکزی نینگ یقینیده یوزبیرگن تو قنه شوو حقیده گپیردی.

واحدی خوددی شو توقنه شووده طالبان کوچلریگه جواب بیریلگن لیگینی معلوم قیلدی.

"قیسقه مدتلیک بیر توقنه شوو یوزبیردی. طالبان تامانی بیلن هم اوچره شوولر بولیب اوتدی و معما حل بولدی. شو وقت بیر قیینچیلیک یوق، چیگره تینچ و آچیق دیر" دیدی.

ایران تامانیدن بیریلگن بیاناتده توناون کونی چیگره ده گی حربیلر بیلن طالبان کوچلری اورته سیده چیگره ده یوزبیرگن توقنه شوولر عاقبتیده 2 نفر ایران حربی کوچلری منسوبی نینگ حیاتینی یوقاتگن لیگی بیلدیریلگندی.

طالبان تامانیدن بیریلگن بیاناتده ایسه بیر نفر اعضاسی نینگ حیاتینی یوقاتگن لیگی معلوم قیلینگندی.

ایککی تامان هم بیربیرینی توقنه شوونی باشله تگن لیگی بیلن عیبله گندی.