بلجیم ده ایران لیک دیپلمات 20 ییل قماققه محکوم قیلیندی

بلجیم ده بیر محکمه, فرانسه ده گی مخالف ایران لیک لرنینگ 2018- ییل ده گی ییغیلیشی گه قرشی هجوم نی ریجه لش عیبلاوی بیلن ایران لیک دیپلمات اسدالله اسدی نی 20 ییل قماققه محکوم قیلدی. 

ایران نینگ اتریش ده گی دیپلماتی بولگن اسدی بیلن بیرگه 3 کیشی, ایران ده گی رهبریت گه مخالف خلق نینگ مجاهد لری تشکیلاتی نینگ مهم اعضا لری گه قرشی ترورچیلیک هجومی اویوشتیریش نی ریجه لش بوییچه عیبدار دیب تاپیلدی.

اسدی, آلمان ده قولگه آلینیب بلجیم گه تاپشیریلگن ایدی.  اسدی دن تشقری ینه 3 نفر ایران لیک نینگ محکمه سی انویرس شهریده دوام ایتماقده ایدی. 

ایران لیک دیپلمات عیبلاو لر نی رد ایتیب محکمه گه بارمس ایدی.  اسدی, آقلاوچی سی واسطه سی بیلن بیرگن بیاناتیده, دیپلماتیک دخلسیزلیگی بولگن لیگی اوچون بلجیم ده گی محکمه گه مخالفت ایتماقده ایدی. 

ایران لیک دیپلمات, انویرس ده یشیاتگن ایران لیک بیر عایله بیلن بیرگه هجوم نی ریجه لش بیلن عیبلنماقده ایدی.  بلجیم قاره لاوچیلیگی, اسدی نینگ بمب نینگ تیارله نیشی بوییچه کیره کلی مواد نی تامین ایتیب بیرگن لیگی نی بیلدیرماقده ایدی.  ایران لیک عایله نینگ موتری ده وقتی عیارلنگن بمب تاپیلگن لیگی و اوشبو بمب نینگ تاثیرسیز وضعیت گه کیتیریلگن لیگی معلوم قیلینگن ایدی. 

اسدی توغریسیده گی دعوی بیلن بیرینچی مرته ایران لیک بیر دیپلمات اوروپا بیرلیگی اعضاسی بیر اولکه ده محاکمه قیلینگن بولدی.  فرانسه, اسدی نینگ ایران استخباراتی نینگ پرسونلی دن عبارت ایکن لیگی نی معلوم قیلماقده.  ایران ایسه اسدی حقیده گی ادعا لرنی رد ایتماقده.