آذربایجان روسیه و ارمنستان مشترک اعلامیه ترقه تدی

آذربایجان، روسیه و ارمنستان تامانیدن تاغلی قاره باغده اقتصادی ترماقلر توزیش و زیربنائی پروزه لر بیلن تیگیشلی مشترک اعلامیه ترقه تیلدی.

روسیه دولت باشلیغی ویلادیمیر پوتین، آذربایجان جمهور باشلیغی الهام علی یف و ارمنستان باش وزیری نیکول پیشینیان روسیه دولت رئیسلیک سرایی کرملین سراییده 4 ساعتلیک بیر اوچره شوو اوتکزدی. تاغلی قاره باغ موضوعی بوییچه اوتکزیلگن اوچره شوونینگ ارتیدن مشترک بیانات بیریلدی.

پوتین تاغلی قاره باغده اقتصادی ترماقلر توزیش و زیربنائی پروزه لر بیلن تیگیشلی مشترک اعلامیه گه قول قوییلگن لیگینی بیلدیردی.

"شو مقصد بیلن روسیه، ارمنستان و آذربایجان باش وزیر اورینباسرلری نینگ باشچیلیگیده بیر ایش تیمی توزیله دی" دیدی.

آذربایجان جمهور باشلیغی علی یف هم روسیه دولت باشلیغی پوتین بیلن کیینچه لیک اوتکزگن اوچره شووده قول قوییلگن مشترک اعلامیه نینگ اهمیتی گه اشاره قیلدی.

"آذربایجان 30 ییل کیین ارمنستان اوستیدن ترانسپورت آرقه لی نخجوان خودمختار جمهوریتی بیلن علاقه قوره دی" دیب افاده ایتدی.

ارمنستان نینگ آذربایجان توپراقلری اوستیدن روسیه و ایرانگه تیمیر یول ارقه لی علاقه قوریش امکانیتی قولگه کیریته جگینی معلوم قیلدی علی یف جنابلری.

آذربایجان اوله راق نخجوان خودمختار جمهوریتی آرقه لی تورک بازاریگه ییتیب باره میز. عین دمده تورکیه - روسیه اورته سیده گی تیمیر یول ترماغی هم قوریله دی" دیب ایتدی.