انقره ده تورک جمهوریت لری قول صنعتلری کورگزمه سی آچیلدی
اوشبو کورگزمه 3- سپتامبر گه قدر دوام ایته دی
تورکیه جمهوریتی پایتختی انقره ده تورک جمهوریت لری عنعنوی قول صنعت لری کورگزمه سی آچیلدی.
انقره نینگ کیچی اوره ن تومنی بلدیه سی بیلن خلق ارا تورک فرهنگی تشکیلاتی (تورکسوی) همکارلیگیده بلدیه گه عاید صنعت مرکزی ده گی کورگزمه نینگ آچیلیشی مراسمی گه کیچی اوره ن شهرداری تورغوت آلتین اوق, عدالت و رواجله نیش حزبی انقره وکیلی زینب ییلدیز, تورکسوی عمومی سکرتری سلطان رایف, قزاقستان جمهوریتی انقره ایلچی خانه سی شارژدافیری میری موکازخان, تورکمنستان سفارتی فرهنگ اتشه سی مردان نورمرادوف, آذربایجان ایلچیلیگی باش کاتبی اسلام گلی اف, شمالی قبرس تورک جمهوریتی معارف اتشه سی بنیامین مرحمتسیز, قزاقستان فرهنگ مستشاری دیماش عمرعلی, اوزبیکستان جمهوریتی سفارتی نینگ 2- کاتبی دلروح تیمیرلی اف, قیزغزستان جمهوریتی سفارتی اتشه سی بیگم آی باقیتبیک و باشقه صنعت سیور لر اشتراک قیلدی.
کیچی اوره ن بلدیه سی باشلیغی تورغوت آلتین اوق, آچیلیش مراسمیده معروضه قیلدی.
آلتین اوق معروضه سیده, "کورگزمه میز بیزنی ایلدیزی میز, تاریخی میز, اوتمیشی میز و مینگلب ییللیک مدنیتی میز گه آلیب باره دیگن بیر کورگزمه دن عبارت. کورگزمه بیزنی ارگنه کون دن تنگری تاغلری, آلتای لردن سایبریا گه و او ییردن ایسه آسیا و انادولو گه آلیب باردی. تورک لرنینگ تاریخی قدیم و همده چقوردیر" دییه قید ایتدی.
آلتین اوق, تورکیه بیلن تورک جمهوریت لری اورته سیده گی بیرلیک و بیردملیک نینگ سونگّی پیتلرده کوچه ییب کیتگن لیگینی بیلدیررایکن, اوشبو بیردملیک نینگ دوام ایتیشی کیره ک ایکن لیگینی ایسله تیب اوتدی.
قیلینگن صحبت لر آرتیدن تورکسوی عمومی سکرتری سلطان رایف تامانیدن آلتین اوق گه, تورک دنیا سی اوچون قیلگن خدمت لری سببلی اوستین خدمت مدالی تقدیم ایتیلدی. شونده ی قیلیب نوار نینگ کیسیلیشی بیلن کورگزمه آچیلگن بولدی.
تورک جمهوریت لری عنعنوی قول صنعت لری کورگزمه سی, کیچی اوره ن بلدیه سی صنعت مرکزیده 3- سپتامبر گه قدر دوام ایته دی.
