اوکراین هوا کوچلری تامانیدن روسیه نینگ حربی کیمه سی نینگ اوریلگن لیگی معلوم قیلیندی

اوکراین هوا کوچلری بیر تامانلیک قوشیب آلینگن قیریم ده روسیه گه باغلیق بیر حربی کیمه نینگ اوروب خنثی قیلینگن لیگینی بیلدیردی.

روسیه بیلن اوکراین اورته سیده قیریم و تیگره گیده گی توقنه شوولر اوزلیکسیز دوام ایتماقده.

اوکراین هوا کوچلری تامانیدن بیریلگن بیاناتده، محلی وقت بیلن کیچه لب ساعت 02:30 ده فئودوسیا قصبه سی قیرغاقلریده اویوشتیریلگن هوا هجومیده روس قاره دینگیز کوچلریگه باغلیق «نوفوچرکسک» حربی کیمه سی نینگ راکت آرقه لی اوریلگن لیگی معلوم قیلیندی.

اوکراین هوا کوچلری قومندانی میکوله اولشچوک بیرگن بیاناتده "روسیه نینگ حربی کوچی کونسایین کوچسیزلشیب بارماقده. هوا کوچلری پیلوتلریگه و فعالیتلرگه قتنشگن برچه منتدارلیک بیلدیره من" دیب ایتدی.

روسیه نینگ اوزیچه قیریم والیسی سرگی اکسیونوف ایسه اوکراین نینگ هوا هجومیده 1 کیشی نینگ اولگن لیگینی 2 کیشی نینگ یره لنگن لیگینی افاده ایتدی.

اوکراین تامانیدن اویوشتیریلگن هجوم طفیلی قصبه نینگ بندریده یانغین یوزبیرگن لیگینی و الولرنینگ قیسقه مدت ایچیده کنترول آستیگه آلینگن لیگینی معلوم قیلگن اکسیونوف برچه عاجل سرویسلرنینگ ساحه ده ایکن لیگینی و کوپلب اوی – جای نینگ تخلیه قیلینگن لیگینی تیلگه آلدی.

روسیه مدافعه وزیرلیگی تامانیدن بیریلگن بیاناتده هم خوددی شو هجوم عاقبتیده کیمه گه زیان ییتگن لیگی بیلدیریلدی.

اوکراین هوا کوچلری تیناون کونی محلی وقت بیلن ساعت 18:30 دن کیچه لب 03:00 گچه روسیه نینگ ایران مالی هیداوچیسیز هوا واسطه لری درون آرقه لی اوکراین گه هجوم اویوشتیرگن لیگینی بیلدیردی.

بیاناتده  19 ته هیداوچیسیز هوا واسطه لری دروندن 13 ته سی نینگ اودیسا، خرسون، میکولایف و هملنیتسکی منطقه لریده یوق قیلیب تشلنگن لیگی قید ایتیلدی.