سویدن تورکیه نینگ اروپا اتفاقی اعضالیگی نی قوللب- قُوَتله یدی

تورکیه جمهوریتی جمهوررئیسی رجب طیب اردوغان, توناون, لتوانیا پایتختی ویلنیوسده گی ناتو رهبر لر ییغیلیشی دایره سیده سویدن باش وزیری اولف کریسترسون و ناتو عمومی منشی سی ینس استولتنبرگ بیلن اوچره شدی. 

تورکیه, سویدن و ناتو اورته سیده گی اوچ تامانلمه اوچره شوو آرتیدن بیریلگن یازمه بیاناتده, تورکیه نینگ, سویدن نینگ ناتو اعضالیگی پروتکل لرینی تورکیه پارلمانی گه آلیب باره دیگن لیگی, سویدن نینگ هم تورکیه نینگ اروپا اتفاقی اعضالیگی پروسه سی بوییچه سعی و حرکت لرنی قوللب- قوتله یدیگن لیگی بیلدیریلدی. 

تورکیه و سویدن نینگ, هم میلادی 2022- ییل مادرید ناتو رهبر لر ییعیلیشیده قوریلگن اوچ تامانلمه دایمی اورتاق میکانیزم و همده وزیر سویه سیده ییلده بیر مراتبه اوچره شه دیگن و اویغون فعالیت گروپ لری قوره دیگن ینگی بیر ایکّی تامانلمه خوفسیزلیک میکانیزمی دایره سیده همکارلیگی نی دوام ایتدیریش بوییچه کیلیشیب آلگن لیگی بیلدیریلگن بیاناتده, قوییده گی جمله لرگه اورین اجره تیلدی: "خوفسیزلیک کمیته سی نینگ دستلبکی ییغیلیشیده سویدن, تروریزم نینگ برچه شکل لری گه قرشی کوره ش نینگ اساسی اوله راق اوچ تامانلمه کیلیشوو نینگ 4- ماده سی داخل برچه عنصر لری نینگ انیق تطبیق ایتیلیشی بیلن علاقه لی بیر پلان نی تقدیم ایته دی.  سویدن, وای پی جی/پی وای دی و تورکیه ده فتو دیب بیلینگن ترور تشکیلات لرینی قوللب- قوتله مه یدیگن لیگینی تکرارله یدی.  تورکیه و سویدن, تروریزم گه قرشی کوره ش بوییچه همکارلیک نینگ, سوید نینگ ناتو اعضالیگی آرتیدن هم دوام ایته دیگن, اوزاق مدتلیک بیر سیاست دن عبارت ایکن لیگی توغریسیده همفکر". 

تورکیه بیلن سویدن نینگ, تورکیه- سویدن اورتاق اقتصاد و تجارت کمیته سی آرقه لی اقتصادی همکارلیک نی کوچه یتیریش بوییچه هم کیلیشیب آلگن لیگی بیلدیریلگن بیاناتده, تامان لرنینگ, ایکّی تامانلمه تجارت و سرمایه گذارلیک نی آرتیریش بوییچه فرصت لردن اینگ یخشی بیر شکلده فایده له نیش یوللرینی قیدیره دیگن لیگی معلوم قیلیندی. 

بیاناتده, قوییده گی جمله لر گه اورین اجره تیلدی:

"سویدن, تورکیه نینگ, تورکیه – اروپا اتفاقی گمرک بیرلیگی نینگ اپدید ایتیلیشی و ویزه معافیتی داخل اروپا اتفاقی اعضالیگی پروسه سی نینگ قیته باشله تیلیشی حقیده گی تشبث لرنی فعال بیر شکلده قوللب- قوتله یدی.  اوشبو هدف و اروپا- اتلانتیک منطقه سی نینگ کوچی نینگ آرتیریلیشی و مدافعه ضرورت لری دایره سیده, تورکیه, سویدن نینگ ناتو اعضالیگی پروتکل لرینی تورکیه پارلمانی گه آلیب باره دی و تصدیق له نیشی اوچون پارلمان بیلن یقین همکارلیکده بوله دی".