زلنسکی اردوغان گه منتدارچیلیک بیلدیردی

اوکراین جمهوررئیسی ولادیمیر زلنسکی, قاره دینگیز غله کیلیشووی نینگ دوام ایتتیریلیشی بیلن علاقه لی توناون قیلینگن قرار سببلی تورکیه جمهوریتی جمهوررئیسی رجب طیب اردوغان و بیرلشگن ملتلر تشکیلاتی عمومی منشی سی آنتونیو گوترش گه منتدارچیلیک بیلدیردی. 

زلنسکی, توناون کیچه تلگرام آرقه لی بیرگن تصویری پیامیده, قاره دینگیز غله دهلیزی کیلیشووی نینگ تورکیه, بیرلشگن ملتلر تشکیلاتی, روسیه فدراسیونی و اوکراین اورته سیده قیلینگن قرار دایره سیده چوزیلگن لیگی نی بهالنتیردی. 

اوشبو پیامیده, زلنسکی, غله کیلیشووی نتیجه سیده 1- آگست دن باشلب اوکراین نینگ اودسا منطقه سی بندر لری دن 450 دن آرتیق کیمه بیلن توپلم 11 میلیون تن گه یقین غذایی مواد نینگ صادر قیلینگن لیگی نی معلوم قیلدی. 

زلنسکی, "اوشبو ایش اوچون برچه سعی و حرکت لرنی قیلدیک و همکارلیک قیلگن اورتاق لری میز گه منتدارچیلیک بیلدیره من. بیرلشگن ملتلر تشکیلاتی عمومی منشی سی گوترش, تورکیه و جمهوررئیس اردوغان گه شخصاً منتدارچیلک بیلدیره من" دییه قید ایتدی. 

زلنسکی, خلق ارا مقیاسده غذایی مواد بحرانی نینگ آلدی نینگ آلینیشی بوییچه غله تشبث لری نینگ کینگیتیریلیشی اوچون مذاکره لر آلیب باریاتگن لیک لری نی بیلدیررایکن, اوشبو تشبث لر ده امریکا قوشمه ایالتلری, آلمان, جاپان, پولند و بلجیم کبی اولکه لرنینگ هم اورین آلیش نی آرزو قیلیاتگن لیگی نی ایسله تیب اوتدی. 

زلنسکی, "دنیا نینگ متحد بولیشی تقدیرده, آچگرچیلیک بولمه یدی" دییه قید ایتدی. 

روسیه نینگ توناون هم اوکراین گه قره ته هوا هجومی اویوشتیرگن لیگی نی بیلدیرگن زلنسکی, اوشبو حادثه عاقبتیده 7 نفر عادی اهالی نینگ اولگن لیگی نی معلوم قیلرایکن, اوشبو رقم نینگ کوتریلیب کیتیشی نینگ ممکن ایکن لیگی نی ایسله تیب اوتدی.