بیرلشگن ملتلر تشکیلاتی افغانستانده آذیق – اوقات تنقیصلیگی حقیده معلومات بیردی

بیرلشگن ملتلر تشکیلاتی افغانستانده 14 میلیون کیشی نینگ آذیق - اوقات خوفی گه دوچ قالگن لیگینی، توییب اوقاتلنمسلیک و آذیق اوقات تنقیصلیگی نینگ اولکه مقیاسیده ییره ب بارگن لیگی بوییچه آگاهلنتیردی.

بیرلشگن ملتلر تشکیلاتی باله لرگه یاردم ییتکیزیش فندی (یونسیف) افغانستان نماینده سی هرو لودوویک دی لیس بیلن دنیا آذیق – اوقات پروگرامی افغانستان نماینده سی مری الن مک گروتی هرات شهری گه ایککی کونلیک سفری نینگ آرتیدن اولکه ده گی آذیق – اوقات تنقیصلیگی معماسی نینگ جدی درجه لرگه ییتیب بارگن لیگی گه دقت قره تدی.

بیرلشگن ملتلر تشکیلاتی ییتکچیلری، قیش فصلی ییتیب کیلرکن افغانستانده گی عایله لرگه تمیز ایچیملیک سوو، آذیق – اوقات و ساغلیک خذمتلری ییتکیزیب بیریش اوچون تیزلیک بیلن حرکت ایتگن لیکلرینی بیلدیردی.

بیرلشگن ملتلر تشکیلاتی باش منشیسی سوزچیسی استفان دوجاریک ایسه افغانستانده 14 میلیون کیشی نینگ آذیق – اوقات خوفسیزلیگی بولمه گن لیگینی عیندمده 3،2 میلیون باله نینگ جاری ییل نینگ سونگگی گچه آذیق – اوقات تنقیصلیگی گه دوچ قالیش ریسکی نینگ موجود ایکن لیگینی ایتدی.  

دوجاریک توییب اوقاتلنمسلیک و آذیق – اوقات تنقیصلیگی نینگ اولکه مقیاسیده ییره ب بارگن لیگی بوییچه آگاهلنتیریب، افغانستانده ییل نینگ آخریگچه 11 میلیون کیشی گه یاردم ییتکیزیب بیریش اوچون کیره ک بولگن 606 میلیون دالردن فقط 35 فایزی نینگ ییغیشتیریلگن لیگینی معلوم قیلدی.

امریکا قوشمه ایالتلری بیلن طالبان اورته سیده 2020 ییلی فبروری آییده بولیب اوتگن کیلیشوو دایره سیده جاری ییلده خلق ارا کوچلرنینگ افغانستاندن چیقیشی بیلن باشله گن جریان نینگ آرتیدن پایتخت کابل نی اوگیریب آلگن طالبان 15 آگست تاریخیده جمهور باشلیغی اشرف غنی نینگ اولکه نی ترک ایتیب قاچیشی بیلن توقنه شووسیز بیر شکلده کنترولنی طالبان قولگه کیریتیب آلگندی.

امریکا قوشمه ایالتلری 31 آگستده افغانستاندن چیقیش جریانینی یکونله گندی.